Lasosyasyon 3enm-az i elekte nouvo komite egzekitiv


17-April-2013

Madanm Gerry pe adres son bann koleg ek envite pandan rankont zeneral Vandredi pase

Eleksyon ti deroul pandan miting zeneral sa lasosyasyon kot Madanm Jeanne d’Arc Gerry ti ganny re-elekte tyermenn.
Miting zeneral ti deroul dan sant kominoter Roche Caiman Vandredi pase.

Lezot manm ki’n ganny elekte i enkli  Antoinette Savy (vis-tyermenn), Imelda Henriette (sekreter), e  John Talma (trezorye).

Vis-trezorye sa lasosyasyon i Rosemary Amade e vis-sekreter i Anette Marie.
Reprezantan bann diferan rezyon ki osi enkli bann zil pros in osi ganny elekte. Zot enkli Marguerite Marie (rezyon nor), Josianne Philoe (rezyon les), Marie-Madeleine Matombe (rezyon was), Daouda Traore (rezyon santral 1), Yvana Pouponeau (rezyon santral 2), James Barbe (rezyon sid) e Daria Adrienne (zil pros).

Rankont zeneral Vandredi ti ganny asiste par bann reprezantan departman devlopman kominoter,  konsey nasyonal pour bann dimoun aze e reprezantan bann diferan klib trwazyenm-az dan pei.
Pandan sa rankont, tyermenn ek trezorye ti prezant zot rapor e bann ki ti prezan ti ganny sans pour demann kestyon e rod leklersisman.
Madanm Gerry ti dir ki lasosyasyon in kapab akonplir bokou pandan son dernyen manda me in annan serten defi.

Enn sa bann defi i en landrwa apropriye avek bann fasilite neseser pour bann trwazyenm-az kapab zwenn regilyerman.
Sertifika ti ganny prezante avek bann manm ki ti lo dernyen komite egzekitiv.

Konseye spesyal pour devlopman kominoter, Dan Frichot, in dir ki bann trwazyenm az i annan en rol vreman enportan pour zwe dan promosyon bann bon valer dan lasosyete.
Msye Frichot in osi felisit sa lasosyasyon e tou bann klib dan distrik pour sa bon travay ki zot pe fer.

Send your comment :

Name *

Email *

Comment *