Bann partisipan dan legzibisyon Lafet Nasyonal i rankontre komite organizater |04 June 2013

Msye Vielle letan i ti pe fer son prezantasyon avek bann partisipan

Sa rankont ti moman pour sa bann biznes konnen egzakteman kote zot stòl pou ete anndan oubyen andeor lasal.
Kordinater sa levennman, Msye Michel Vielle, ti prezant bann ki ti prezan  avek en plan detaye kote sak bann stòl in ganny plase e bann ki ti’n soumet zot laplikasyon an retar pa ti aparet lo sa plan e la zot ti ganny enformen ki zot osi zot pou ganny enkli lo sa plan me se selman pandan lasemenn ki zot pou konnen kote zot stòl pou ganny plase.

Sa rankont Sanmdi ti deroul selman en zour apre dat limit ki tou sa ki ti anvi partisip dan sa legzibisyon ti’n devret soumet zot laplikasyon.
I annan antou 145 biznes, lorganizasyon ek lezot endividi ki’n ziska prezan konfirm zot partisipasyon dan sa levennman.

Bann partisipan ti ganny tou bann detay ki pou ede asire ki sa levennman i deroul byen e dan lord.

Par egzanp Msye Alain Volcère, enn bann manm organizater, ti fer en prezantasyon lo seremoni louvertir limenm e bann mezir sekirite ki pou anplas pandan sa trwa zour. Ti osi annan en prezantasyon par Manmzel Naomi Youpa sorti kot Minister Lasante ki ti  eksplik bann partisipan nesesite annan bann bon pratik lizyenn kot i konsern preparasyon, prezantasyon, fason kwi e prezerv manze ki zot pou vann avek piblik pandan sa trwa zour.  

Lo zot kote bann partisipan ti osi annan bokou kestyon e zot ti rod klarifikasyon lo plizyer size parey koneksyon delo ek elektrisite, mezir sekirite kont danze en lensandi e lezot mezir sekirite parmi plizyer pwen ankor.