Dife i parsyelman detri en lakaz La Louise


06-June-2013

Zofisye servis tenny dife ek lapolis pe evalye dega koze par sa dife

Sa lensidan ti ariv Mardi bomaten dan sa lakaz ki ti abrit trwa dimoun – Pascal Edmond ek son madanm Cynthia, ensi ki zot fiy.

Letan ki dife ti konmanse, zis Msye Edmond ki ti kot lakaz vi ki i travay lanmenm kot lakour dan son garaz. Son madanm, ki en ners, ek son fiy, ki en ansenyan, ti pe travay.
Dapre portparol servis tenny dife ek sovtaz Jones Madeleine, ti anviron 10er45 Mardi bomaten ki zot ti ganny enformen lo sa dife.

I dir ki zot pa ti pran bokou letan pour ariv kot sa lakaz, me vi ki semen ti enpe sere zot ti deplas en pti kanmiyon tenny dife ek de pli gro. Enn dan sa 2 gro kanmiyon ti aret obor grann rout e lot ti aret dan milye semen. Zot ti bezwen azout tiyo ant sa bann kanmiyon pour zot arive tenny sa dife. 
Dife ti dan salon, lasanm ek lakwizin.

«A en serten pwen nou ti bezwen aret tenny dife e rod lasistans PUC akoz ti annan kouran ki ti en danze pour bann zofisye tenny dife vi ki dife ti plis dan plafon,» Msye Madeleine ti dir.

I ti azoute ki bann travayer PUC pa ti tarde pour vin asiste zot pour koup laliny kouran ki al kot sa lakaz. Ti anviron 11er50 ki servis tenny dife ek sovtaz ti kapab met en lafen avek sa dife.
 
Msye Madeleine in profite pour lans ankor en lapel avek tou dimoun pour pran en pe plis prekosyon, pour fer sir zot tenny gas, pa kit nanryen lo dife, tenny karo.
I ti azoute ki «nou pa kapab elimin bann risk ki koz dife, me nou kapab redwir sa bann risk».

Send your comment :

Name *

Email *

Comment *