Dife i detri en loto konpletman |12 June 2013

Dapre Msye Jones Madeleine, portparol pour lazans servis tenny dife ek sovtaz, ti ver 6er52 Lendi swar ki zot ti ganny enformen lo sa dife.

Lazans servis tenny dife ek sovtaz ti deplas enn zot gro kanmiyon tenny dife ek 4 zot zofisye pour al donn lasistans kot sa loto ti ete.
 
Pa ti pran zot bokou letan pour zot ariv kot sa lensidan e ti pran zot en maksimonm 10 minit pour tenny sa dife.
En lanket in konmanse pour esey determin lakoz sa dife.

Msye Madeleine in lans en lapel avek tou propriyeter transpor ki bann tel keksoz parey bann laranzman difil ki zot mal aranze dan transpor, bann fuse ki zot sanze i bann risk ki kapab koz dife dan zot transpor.

«I preferab si zot oule fer okenn sanzman difil dan zot transpor ki zot al kot en dimoun profesyonnel ki i konnen ki i pe fer,» Msye Madeleine ti dir.

I ti profite pour ankor enn fwa dir ki «nou pa kapab elimin bann risk ki koz dife, me nou kapab redwir sa bann risk».