Kominike Lapolis


12-June-2013

Se son boper ki ti enform son konpanny, manman Archille Gabriel, ki son garson in pann e a son tour sa madanm ti enform lapolis.

Dapre boper Archille ler i ti ariv kot lakaz Lendi bomaten ver 6er45 Archille ti la e li apre i ti al repoze apre en lannwit travay. I azoute ki ler i ti leve ver 1er15 apremidi i ti tann lanmizik pe zwe for dan lakaz. I ti kriy Archille me ti napa repons e apre i ti trouv li pann kot en bout ki pe ganny azoute avek lakaz.
Lapolis ti ganny sa rapor pann ver 1er25 apremidi Lendi.


****
Lapolis in raporte ki Gerard Volcy ki reste Baie Lazare in kondann ankor sa semenn. Lendi lakour mazistra ti pas en santans 12-an lo Volcy pour kas lakaz ek 4-an pour vole. Nou a rapel ki Volcy ti an Mars sa lannen kondann en total 14-an pour 3 diferan lofans lye touzour avek kas lakaz e vole.

Lakour in ordonnen ki Volcy pou komans deservi sa term 16-an ki’n ganny pase lo li apre ki i konplet sa term 14-an ki in konmanse an Mars. Sa i vedir ki Volcy i annan en total 30-an pour fer prizon.
 
****
Lapolis in osi raporte ki i pe detenir 7 zonm aze an 19 a 29-an, sispe dan en lensidan kot 3 Endyen ki pe travay Sesel ti ganny vole zot larzan ek 2 telefonn portab La Promenade Dimans pase ver midi.

Apre ki rapor ti’n ganny fer Kordgard Santral, lapolis ti reponn pour asiste e dan lespas 1 erdtan edmi sa 7 sispe ki ti’n kas an 2 group ti ganny arete – 4 ti ganny arete ver 1er tandi ki 3 lezot ver 1er30 dan zanmerant Cable & Wireless.

Swivan lanket dan sa ka, lapolis in reisi rekiper 1 sa telefonn portab ki zot ti’n vole pour zot viktim.

Sa 7 sispe ki reste dan diferan distrik lo Mahé ti ganny anmenn ankour Lendi e zot in ganny rimann pour repas ankour le 20 Zen.
 
 ****
Lapolis in ouver en lanket kont en zonm ki ti annan dan son posesyon en laptop ki pa ti pour li. Larestasyon sa zonm ti fer boner Lendi apremidi apre ki en zofissye ti’n kriy li pour gete kwa ki ti dan en goni ki ti avek li.

Sa zonm ti zet sa goni e taye me i ti ganny arete deswit apre. Lapolis ti plitar idantifye propriyeter sa laptop. Sa i en madanm ki son lakaz ti’n ganny kase dan distrik Mont Fleuri pli boner Lendi menm.
 

Send your comment :

Name *

Email *

Comment *