Rezidans pour bann dimoun aze-Lasanble i demann en revizyon dan kriter pour admisyon


13-June-2013

Loter sa mosyon, manm elekte pour Beau Vallon Mirena Souris, i dir ki sa i ava fer sir ki napa labi dan sa sistenm.

Madanm Souris ti fer resorti dan son prezantasyon lo sa mosyon ki i malere pour vwar ki ozordi en bon poursantaz rezidan ki ganny admet dan sa bann rezidans pa ni zwenn bann kriter e an rezilta serten bann dimoun aze ki vreman bezwen antre dan enn sa bann rezidans pa ganny plas e sa i en labi.

Madanm Souris ti fer resorti ki i annan menm bann ka kot serten sa bann dimoun ki dan rezidans i annan zot prop propriyete me zot in ganny tire dan zot lakour e met dan rezidans par bann manm zot fanmir ki evantyelman in fini pran kontrol lo sa bann propriyete e les sa bann dimoun dan rezidans anba responsabilite gouvernman ek kominote e i tre rar ki ou vwar zot pase pour vin vwar sa bann vye paran.

Madanm Souris in propoze ki en management board i ganny etabli avek bann profesyonnel kalifye e spesyalize dan swen bann dimoun aze ki a ganny gide par sa polisi avek bi pour redwir labi dan sistenm.

Madanm Souris ti fer remarke ki ozordi plis ki zanmen avek sa ogmantasyon e demann pour en plas dan bann rezidans par bann dimoun aze, en revizyon dan polisi ek kriter admisyon i a fer ki keksoz a vin pli transparan dan en fason ki zis bann ki vreman merite ki a ganny sa loportinite pour ganny admet dan en rezidans rezyonnal.

Fodre dir ki ozordi dan Sesel i annan 10 rezidans dan distrik lo Mahé, Praslin, La Digue enkli enn rezyonnal baze North East Point.
Madanm Souris ti osi port a latansyon lasanble ki statistik i montre ki ansemoman i annan 131 dimoun dan sa bann rezidans.

Me parkont dan rezidans rezyonnal i annan dimoun depi laz 21-an ziska 103-an. Parmi i  annan 29 dimoun ki anba 63-an e Madanm Souris ti fer resorti ki laplipar ki tonm anba 63-an pa pe resevwar okenn benefis ouswa lasistans malgre zot pe ganny tou zot neseser.

Madanm Souris ti admet kantmenm ki avek devlopman, natir travay, responsabilite e fasilite lozman sa pa permet serten fanmir ki ti a voudre ki zot vye paran i reste avek zot fer li e akoz ki rezidans i plen e menn parfwa sa bann granmoun pa zwenn kriter i fer ki zot napa en landrwa pour met zot vye paran.

Avek bi pour soulaz sa tel group fanmir ki tonm dan sa kategori, Madanm Souris in propoze ki gouverman i met a dispozisyon later e sekter prive i a envestir dan bann sant tel parey rezidans rezyonnal kot zot a kapab osi ofer tou servis menn sa ki nou appel «respite care».

«Bann sant parey ava donn en opsyon pour soulaz sa bann tel demann,» Madanm Souris ti dir.

Send your comment :

Name *

Email *

Comment *