Follow us on:

Facebook Twitter LinkedIn YouTube

Archive - Archive 2004 - July 2013

Lapolis i reatrap sa trwa deteni ki ti’n sove |01 July 2013

Portparol lapolis Jean Toussaint in remersye manm piblik pour zot led ek lazistans ki’n kontribye dan larestasyon sa trwa zonm.

Msye Toussaint i dir ki menm si ti annan kou-d-fizi ki ti ganny tire anler dan sa zanviron ti zis pour stabiliz sa landrwa avan aret sa bann zonm e ki personn pa’n ganny okenn dimal.

********
Lapolis i detenir en sispe dan lanmor en zenn madanm

En zonm 33-an sorti Anse Louis pe ganny detenir koman sispe dan lanmor en zenn madanm 26-an, Petrina Belle, ki ti reste Anse Boileau. Lekor Petrina ti ganny dekouver Vandredi swar borlanmer Anse à la Mouche dan krwaze semen ki al Baie Lazare.

Petrina ti pou selebre son 27enm lanniverser demen.
Dapre son ser, ti ver 8.30 Vandredi swar apre ki Petrina -- ki ti travay kot St Michel Complex, Anse Aux Pins -- pa ti ankor ariv se li, ki zot ti esey rod lasistans lapolis. Me vi ki lapolis pa ti pe reponn telefonn, manman Petrina ti desann limenm kordgard Anse Boileau me i pa ti zwenn okenn gard laba e enpe letan apre i ti ganny en kou-d-telefonn pour enform li ki Petrina ti’n ganny pike e ki i ti’n mor.

Portparol lapolis Jean Toussaint i dir ki lapolis in kapab konstate ki sa zenn madanm in mor an rezilta plizyer blesir lo son lekor.

Msye Toussaint i dir ki lapolis in servi plizyer lenformasyon ki zot in gannyen enkli avek fanmir Petrina pour lans zot lanket e fer sa larestasyon.

I dir ki sa sispe ti dan en relasyon avek sa viktim. Ser Petrina ti dir ki son ser ti’n deza raport avek lapolis ki son lavi ti pe ganny menase. Lapolis pe kontiny zot lanket.

*******
En zonm 66-an i noye

Lekor James Bibi, en zonm 66-an ki ti’n aparaman noye, ti ganny ranmase lo lans Anse Soleil Vandredi  swar. Lapolis pe fer lanket pour determin sirkonstans sa lensidan.

Kouzen Msye Bibi, Gaetan Brutus, ti dir ki ti ver 7er sa zour swar ki Msye Bibi ek serten lezot manm son fanmir ti’n pas kot li e ti konsonm ankor enpe lalkol avek li avan ensiste pour pas lo lans pour retourn se li menm si lezot manm son fanmir ti’n konsey li pou esper zot pour donn li en pasaz avek zot dan loto pli tar.

Msye Brutus i dir ki letan Msye Bibi ti ganny dekouver pli tar ater lo lans, ansanm avek vwazen zot ti fer zot mye pour esey revey li e frot son vant e roul li ater dan lesey pour fer li rann delo, me ti’n tro tar.
 

 

 

» Back to Archive