Lapolis i donn detay lo lensidan wikenn


02-July-2013

Nou a rapel ki Vandredi ti annan en mert ki ti ganny raporte, kot lekor en zenn madanm Petrina Belle ti ganny trouve borlanmer Anse à la Mouche dan krwaze semen Baie Lazare.

Apre ki Petrina pa ti ankor ariv se li, fanmiy sa viktim ti telefonn kordgard pour rod lasistans avek lapolis me personn pa ti reponn telefonn.
Manman Petrina ti deside desann limenm kordgard me an arivan laba i ti vwar ki kordgard ti fermen.

Pandan en konferans lapres avek medya yer apremidi kot Kordgard santral, Komisyonner Lapolis Ernest Quatre ek lezot zofisye sa lafors ti donn plis detay lo rezon ki kordgard Anse Boileau ti fermen Vandredi swar apre ki fanmiy sa viktim ti’n dir ki zot pa ti’n ganny lasistans avek lapolis.

Msye Quatre in dir ki sa zofisye ki ti resevwar kou-d-telefonn konsernan sa lensidan ti enform duty officer. Lenstriksyon ti ganny donnen pour ferm kordgard pour al kot sa lensidan ti’n arive pandan ki laranzman ti pe ganny fer pour lezot zofisye vin dan kordgard.

“Me malerezman kou-d-telefonn ki ti sorti kot sa fanmiy in antre avan ki sa bann zofisye in ariv kordgard e pandan sa letan sa de zofisye ti’n deza ariv kot sa mert ti ete,” Msye Quatre ti dir.

I ti azoute ki apart ki sa mert, ti annan lezot lensidan ki lapolis dan sa rezyon ti pe trete tel ki sa lensidan kot en zonm 66-an ki ti’n aparaman noye ti’n ganny ranmase lo lans Anse Soleil sa menm swar.

« I tre rar ki bann lensidan i ariv anmenmtan e tou gard in angaze dan bann loperasyon me sa i pa vedir ki nou napa gard dan bann kordgard pour ferm kordgard,» i ti fer resorti.
En zonm 33-an sorti Anse Louis ti ganny arete an koneksyon avek sa ka mert. Sa sispe in pas ankour yer e i pe rimann pour 14 zour.

Dapre sa fanmiy, Petrina ti’n deza raport avek lapolis ki son lavi ti pe ganny menase e in menm annan en lensidan kot sa sispe ti bles li oparavan.

Msye Quatre in dir ki sa bann rapor in antre kot lapolis e ki in annan serten aksyon ki’n ganny fer e i form parti levidans dan sa lanket ki pe ganny fer.

Parmi bann lezot lensidan ki lapolis in trete pandan sa wikenn i sa trwa deteni ki ti sove Vandredi e ki ti ganny atrape sa menm swar dan distrik Pointe Larue.
Msye Quatre i fer resorti ki i fer premye fwa ki prizonnyen i sove par defons twatir en transpor.
Dimans in osi annan en madanm aze 73-an sorti dan distrik Anse Boileau ki ti ganny ranmase mor dan semen dan distrik Baie Lazare. En lanket in ouver dan sa ka antretan ki lapolis pe esper rezilta letopsi pour determin lakoz son lanmor.

In fer resorti ki mwan Zen in enn tre sarze kot lafors lapolis in bezwen tret bann lensidan ki’n arive e asir sekirite dan bann distrik e dan bann aktivite o nivo nasyonal.

Lapolis ti osi entervenir Glacis kot en group 25 a 30 zanfan lekol ant 12 a 14-an e menm pli zenn ti’n al fer en piknik e konsonm labwason e answit vin lo semen piblik pour kree dezord.

Msye Quatre i dir aksyon in ganny pran e lanket pe kontinyen e enn bann pwen ki pe ganny trete se kote sa bann zanfan in kapab ganny akse avek lalkol.

Pour sa spektak mizikal Busy Signal, ki ti deroul le 29 Zen dan NSC Hall Roche Caiman, Msye Quatre ti dir ki lapolis pa’n ganny okenn gran problenm e ki loperasyon pour sa sware in byen marse.
In felisit bann zofisye lapolis ki’n travay pour asir sekirite pandan sa bann aktivite e ki’n entervenir dan bann lensidan ki’n devlope pandan mwan Zen.

Msye Quatre in dir ki apre sa bann lensidan, lapolis in vwar ki i annan serten defayans ki devret ganny aranze e revwar serten stratezi, me in reasir piblik ki lapolis pe fer tou son posib pour asire ki sekirite i an plas e pe mars byen.

 

Send your comment :

Name *

Email *

Comment *