Mary Astova Pilate i selebre 104-an |18 July 2013

Madanm Mary Astova Pilate, en zabitan Bel Air me ki pe reste Lopital North East Point, li in depas sa leksplwa. Antoure avek manm son fanmiy, zanmi, staf e koleg pasyan Lopital North East Point, i ti selebre son lanniverser 104-an Dimans dan en pti seremoni ki ti deroul kot sa lopital.

Minis pour Zafer Sosyal, Devlopman Kominoter ek Spor Vincent Meriton, Manm Lasanble Nasyonal pour distrik Bel Air Nichole Barbe, sekreter prensipal pour Lasante Peggy Vidot ek konseye spesyal pour Devlopman Kominoter Dan Frichot ti osi prezan.

Selebrasyon lanniverser ti komans avek en lanmes selebre par kire parwas Glacis, Per Guy Inkumene, ki ti demann bann envite « pour kontan nou prosen e pa abandonn lezot dimoun ». Pour ilistre sa mesaz i ti fer referans a parabol bon Samariten dan Levanzil Sen Luc kot en voyazer ki ti’n ganny bate avek bann bandi ti ganny sove par en Samariten, ki ti pourtan ganny konsidere koman en move dimoun. Sa Samariten ti sonny blesir sa voyazer e pey en lasanm lotel pour li.

« Pa ezite pour sov en lot dimoun parey Zezi i sov nou e anmenn nou dan son lotel, dan son legliz », Per Guy ti dir.

Dan en pti diskour apre lanmes, Minis Meriton ti osi lans en lapel pour nou montre lanmour ek konpasyon pour lezot, sirtou bann ki lopital ou dan lospis.
« Mon lans en lapel pour vizit nou fanmiy ki pa devret en fardo pour nou akoz nou osi en zour nou pou bezwen latansyon lezot. »

Me parey bon Samariten, sa lanmour ek konpasyon ti montre par Geneviève Balthilde, en pti fiy 13-an ki ti ed Madanm Pilate manz son gateau, e sirtou en dizef zwazo ki i ti’n demann Madanm Tella Lalande pour anmenn pour li.

Geneviève ti eksplike ki i form parti en group lapriyer dirize par Madanm Lalande e ki zot vizit Madanm Pilate ek lezot dimoun aze e malad tou le semenn. I ti azoute ki zot anmenn bann manze ki zot apresye e ki Madanm Pilate i kontan manz friyapen griye.

Sirman sa latansyon ki Madanm Pilate i gannyen i en rekonpans pour sa bon Samariten ki li osi in ete dan son lavi. I rakonte ki si i pa’n zanmen annan zanfan, in kanmenm sonny bokou zanfan. De parmi son bann zanfan sonnyen ti osi prezan Dimans.

Madanm Pilate, ki ti selebre son lanniverser lo son lili akoz i pa vwar kler e i nepli kapap marse, i ankor koze e sante, parey i ti montre ler i ti sant for kantik Oh Reine des Seychelles, ki enn son laliny i dir « La foi, l’esperance et la charité qui ne meurent pas ».

Madanm Pilate ti dir ki, parey Per Guy ti fer remarke ki lesperans se semen lavi eternel, se zisteman son lafwa ek lagras Bondye ki’n fer li viv ziska sa laz.