François Havelock (05-09-1955 – 17-07-2013)-Lerwa sega … en vre lezann


20-July-2013

 François lo kouvertir enn son CD

Me Merkredi le 17 Zilyet, Sesel ti perdi sa zonm deryer tou sa bann sanson. Sa se santer e konpoziter François Havelock. Li ki’n souvan partisip dan plizyer spektak lanmizik ki ganny organize lo nivo nasyonal tel parey Lakadans.

Wi bokou ti soke pour aprann lanmor François, ki’n en pilye dan lanmizik Sesel, menm si nou ti konnen ki ‘Ton Farser’ ti malad tou resaman.

Ne e grandi Beau Vallon avek son papa ki ti zwe vyolon ek son manman ki ti kontan dans kanmtole, François ti devlop son lentere dan lanmizik e i ti konmans aprann zwe gitar a laz 12-an. Son sanson ‘Beau Vallon Lontan’ i prouv nou ki degre i ti kontan son distrik. Se atraver bann tel sanson ki François ti resevwar en pri spesyal pour promot son distrik atraver lanmizik.
Menm si konman ou nonm non François ou mazin lanmizik, François ti en elektrisyen kalifye e in menm fer landscaping.

Dan en antretyen avek Jimmy Savy, sef egzekitif Konsey Nasyonal pour Lar, i ti dir ki François i en vedet lo lasenn lanmizik Seselwa.

« François in en dimoun spesyal e mon pa krwar i annan en lot ki kapab pran son plas,» Msye Savy ti dir. «Ou pa pou zanmen kapab koz lanmizik Seselwa san nonm non François Havelock. I en ikonn. Kwa ki fer li en ikonn se parske son lanmizik i enflians bokou ban zenn e menm bokou in resant son bann sanson,» Msye Savy ti azoute.

Msye Savy in profite pour anvoy son mesaz kondoleans pour fanmiy François lo la par Minister Kiltir ek Tourizm e lo la par tou mizisyen Seselwa.

François i kit deryer 2 fiy ek 1 garson. Menm si son prezans pou nepli la, lavwa François pou reste touzour vivan avek nou atraver sa bann melodi e sanson tel parey ‘Beau Vallon lontan’, ‘Lavi Mizisyen’, ‘Mon mazin ou’, ‘Sa pa en mannyer’, ‘Koko riko’, ‘Koke Koka’ ek ‘Pti pwason rouz’, ki anmenn lazwa de viv parmi bokou Seselwa.

Son lekor pou ekspoz kot Padayachy Funeral Parlour kot Katedral Imakile Konsepsyon ozordi depi 8er bomaten swivi par servis fineb legliz Bel Ombre 11er.

B. Damou

Send your comment :

Name *

Email *

Comment *