Lazournen Nasyonal-Manm komite lorganizasyon i ganny onore


29-July-2013

VP Faure i remet sertifika avek ansyen tyermenn komite, Msye Belmont

Bann ansyen manm ti resevwar en sertifika. Zot konpri ansyen Vis-Prezidan Joseph Belmont ki ti osi tyermenn avan, ansyen Minis Patrick Pillay, Minis Jean-Paul Adam, Minis Idith Alexander e Minis Macsuzy Mondon, Patrick Nanty, Michael Charlette, Jude Valmont, Randolph Felix, Gustave Decommarmond, Terry Romain e Derrick Ally.

Kant a bann manm aktyel, zot ti resevwar en sertifika e en tokenn lapresyasyon. Sa i Francoise Schroff, Aude Labaleine, Jacqueline Moustache-Belle, Renette Nicette, Jeanne Simeon, Benjamine Rose, Vicky Van der Westhuizen, Merida Delcy, Gerard Lafortune, Antoine-Marie Moustache, Jarrel Nibourette, Damien Thesée, Gervais Moumou, Franco Govinden, Denis Rose e Alain Volcère.

Bann manm ti a zot tour ofer Vis-Prezidan Faure avek en kado, en portre souvenir komite 2013 ki ti prezante par Madanm Moustache-Belle, ki osi kordinatris selebrasyon Lafet Nasyonal.

De manm komite, Msye Lafortune e Msye Moustache ki’n pas plis ki 20-an lo komite, ti dan en fason tre detandi rakont bann anekdot ki’n mark legzistans sa komite depi 1993. Zot ti osi dekri Madanm Schroff, ki’n egalman lo komite pandan plis ki 20-an, koman manm avek plis leksperyans.

Bann manm komite dan en portre souvenir avek ansyen tyermenn, Msye Belmont

O non zot bann koleg, zot ti remersye tyermenn ansyen e aktyel, Msye Belmont e Msye Faure, pour zot soutyen dan komemorasyon le 18 Zen.

Zot ti eksprim zot apresyasyon pour bon lantant ant bann manm e osi bon korperasyon piblik ki’n fer Lafet Nasyonal toultan en sikse.
«Sa ki nou’n fer lo nivo volontarya i vreman eksepsyonnel,» zot ti fer remarke.

Sware ti osi konpri performans par gannyan konpetisyon sanson Lazournen Nasyonal 2008 Michelle Marengo e Terence Madeleine ki ti ganny dezyenm pri dan menm konpetisyon sa lannen.

Send your comment :

Name *

Email *

Comment *