Manm brigad dirzans i ganny remersye pour zot servis |12 November 2013

Bann manm brigad distrik ti regroupe Sanmdi le 9 Novanm dan en seremoni ki ti organize par Minister Zafer Sosyal, Devlopman Kominoter ek Spor dan lasal NSC, Roche Caïman.

Prezan pandan sa seremoni  ti Minis Dezinyen, Msye Vincent Meriton, ki osi Minis pour Zafer Sosyal, Devlopman Kominoter ek Spor, Minis pour Lanvironnman ek Lenerzi, Profeser Rolph Payet, bann ladministrater distrik, bann manm brigad distrik sorti dan tou le 25 distrik e lezot envite.

Pandan sa seremoni bann manm brigad ti ganny prezante avek en sertifika koman en sinny lapresiasyon.

Sertifika ti ganny aksepte par bann reprezantan pour sak distrik. Ti osi annan 2 trofe ki ti ganny ofer pour sa de rezyon ki’n pli aktiv pandan sa lannen. E sa i rezyon zil pros ek santral les.

Ti osi annan prezantasyon sertifika avek bann partener ki ed bann brigad dirzans. E sa bann partener i Sosyete Lakrwa Rouz, Lazans Servis Tenny Dife ek Sovtaz, ek Divizyon Risk ek Dezas.

Dan son diskour, Minis Meriton ti profite pour remersye sa bann manm brigad dirzans pour zot devosyon, kouraz e zefor ki zot annan koman en sitwayen ki ofer zot led volonter pour ede dan bann moman difisil e trazik.

«Nou oule ki zot konnen ki nou rekonnet e nou apresye zot zes volonter bokou, akoz san zot nou konnen ki bann sitiasyon ti ava kapab bokou pli grav,» Minis Meriton ti dir.

I ti osi fer resorti ki bann brigad dirzans dan distrik in annan en progranm byen sarze sa lannen kot zot in rann lapel pandan sa gro dezas e linondasyon pandan Zanvye e i ti salye zot pour zot zefor.

Apard donn zot led dan bann moman dirzans, bann manm brigad dirzans ti demontre zot talan atraver sanson, ladans, pyes e lezot form lar.

Apre zot ti zwenn avek bann envite pour konverse pandan ki zot ti pran en pti rafresisman.