Departman Devlopman Kominoter i onor bann zonm |20 November 2013

Alokazyon Lazournen Enternasyonal bann Zonm yer, Departman Devlopman Kominoter dan Minister Zafer Sosyal, Devlopman Kominoter ek Spor ti onor son bann travayer zonm dan en pti seremoni ki bann madanm dan sa departman ti’n organize.

Dan sa pti rankont, ki ti deroul dan batiman Ocean Gate House yer apremidi dan prezans Minis pour Zafer Sosyal, Devlopman Kominoter ek Spor Vincent Meriton, sak madanm ti ofer en koleg zonm en roz zonn ek en pti kado.

Bann madanm ti osi resit poenm e sant sanson an loner zonm.

Aktivite ti osi konpri en moman refleksyon atraver lapriyer ek en prezantasyon lo lasante bann zonm.

Lo non lezot madanm, Jenita Laporte ti swet bonn fet a tou son bann koleg zonm.

Kant a Minis Meriton, i ti koz avek bann zonm lo nesesite pour prezerv zot lasante.