Esmy Payet i fet 100-an |26 November 2013

Madanm Esmy Payet, en zabitan Ma Constance dan distrik Anse Etoile, ti fet son 100enm lanniverser Vandredi.

I ti selebre sa lokazyon dan en pti lafet ki ti’n organize dan sant kominoter sa distrik dan prezans son fanmir e osi Minis pour Zafer Sosyal, Devlopman Kominoter ek Spor Vincent Meriton e manm Lasanble Nasyonal pour Anse Etoile Onorab Melval Dugasse.

Selebrasyon ti osi enkli en lanmes selebre par kire laparwas, Per Richard.
Dan en pti sermon, Per Richard ti dekri sa levennman koman  en lazwa pour fanmir Madanm Payet e en loner pour son distrik.

I ti dir ki letan nou pe demande ziska ki laz nou pou viv, Madanm Payet, malgre in pas dan difikilte, in viv lontan akoz  in viv ek Bondye e in donn son lavi Bondye.

Minis Meriton ti swet Madanm Payet bonn aniverser e i ti profite pour fer remarke ki akoz dan nou pei bann madanm i zeneralman pli responsab e zot viv pli lontan ki bann zonm, i neseser pour adres size lasante bann zonm e bann zonm i devret pran plis swen avek zot lasante.

«I annan bokou plis madanm ki zonm ki viv 100-an ou plis. Plis zonm osi i soufer e mor avek diferan maladi. Nou bezwen travay pour prolonz lavi nou bann zonm. Dan lekol osi bann fiy pe fer pli byen ki bann garson. Donk i neseser pour elve bann garson pour ki zot vin bann zonm responsab,» i ti dir.

Minis Meriton ti osi ofer Madanm Payet en pannyen manzay (hamper) sorti kot Prezidan Michel.
Malgre son 100-an, Madanm Payet i ankor byen for e i ankor kapab marse e koze.

Pandan son lafet lanniverser Vandredi, i ti kapab koup son gato, soufle son labouzi e dyalog avek bann envite ki ti prezan.