Distrik pli kiltirel pou ganny rekonpanse |29 November 2013

Bann distrik ki pli byen prezerv e sovgard zot leritaz tradisyonnel ek kiltirel pou byento ganny rekonpanse e sa pou atraver konkour Pri Distrik Kiltirel.

Sa konkour, ki en linisyativ Departman Kiltir an kolaborasyon avek Minister Zafer Sosyal, Devlopman Kominoter ek Spor ansanm avek tou bann distrik, ti lanse ofisyelman Merkredi apremidi par Minis pour Tourizm ek Kiltir Alain St Ange.

Sa ti deroul dan lasal Teat de Palm, Mont Fleuri, pandan en seremoni tre kiltirel avek bann sanson, ladans kanmtole ek lezot ladans tradisyonnel osi byen ki resital poenm.
 
Minis pour Zafer Sosyal, Devlopman Kominoter ek Spor ti resevwar en kopi tou bann dokiman sa konkour avek Minis St Ange.

En logo pour sa konkour, desinen par artis Urny Mathiot, ti osi ganny devwale pandan sa seremoni e bann dimoun prezan ti osi ganny sans konn enpe plis lo bann diferan leritaz kiltirel ek tradisyonnel ki bann distrik zot annan e sa ti atraver en dokimanter video.

Sa konkour i divize an 4 kategori:

- bann vye batiman ek leritaz natirel parey vye simityer, pon, lakaz, distilri ek lezot;

- leritaz artistik e sa i enkli ladans, lanmizik, lakwizin, skilptir, literatir, lapentir ek lezot ;

- leritaz vivan e sa i bann dimoun parey bann erbalis, artizan, dimoun ki gard mous dimyel ek lezot;

- Zwe ek performans tradisyonnel parey kouk, ronn, kezer, makonn, boulko, zwe kafoul e lezot ankor.
 
Bann aktivite pou pran par dan sa konkour pou deroul tou dilon lannen e bann distrik zot annan ziska le 31 Mars 2014 pour soumet zot bann dokiman lanrezistreman pour partisip dan sa konkour ki son premye prezantasyon pri pou fer an Novanm 2014.
 
Bann pri pou larzan e zot pou varye ant 25 ziska 150 mil roupi.

Letan i ti adres tou bann ki ti prezan responsab komite tenm nasyonal e osi Minis pour Lanplwa ek Devlopman Resours Imen, Idith Alexander, ti dir ki souvannfwa ler nou tann nonm kiltir, premye keksoz ki vin antet se nou bann ladans tradisyonnel tel parey moutya, kanmtole ou sega.

«Me kiltir en nasyon i anglob diferan laspe ki enkli lakwizin, sit leritaz, fason viv, lartizana e bann bon valer ek moral ki nou zanset in travay dir pour kapab prezerve pour nou bann fitir zenerasyon,» Minis Alexander ti dir.

I ti azoute ki i zisteman sa bann valer ki tenm nasyonal ‘Travay Dir Pour Nou Sesel’ pe demontre e promouvwar dan nou sosyete.

Minis Alexander ti felisit Minister Tourizm ek Kiltir pour sa linisyativ pour entrodwir sa Pri Distrik Kiltirel.

«Sa linisyativ i ava konplemant tenm nasyonal akoz i pou ede kre plis loportinite travay pour nou  bann sitwayen o nivo distrik,» i ti azoute.


«Sa i ava ankouraz zot pour bouze e travay ansanm pour sovgard nou lekonomi,» i ti fer resorti.

Manmzel Alexander ti osi lans lapel avek tou dimoun zenn koman vye e ankouraz zot pour zwenn ansanm pour partisip dan sa konkour e met zefor pour elev zot distrik ek nou kiltir pli o.

I ti renouvle langazman son minister pour kontinyen siport Minister Tourizm ek Kiltir lo sa progranm anbisye pour kontinyen met kiltir o sant devlopman distrik.

Lo son kote Minis St Ange ti fer rapel ki met kiltir o sant devlopman soutenab i vizyon plan stratezik Departman Kiltir pour peryod 2011-2015. Pri Distrik Kiltirel i alor reponn bezwen pour met kiltir non pa zis o sant devlopman nasyonal me osi o sant devlopman soutenab dan tou distrik - ki tou dimoun, zenn koman vye, ava partisip dan bann aktivite artistik ek kiltirel dan kad sa konkour.

Minis St Ange ti dir ki sa konkour pa devret ganny vwar zis koman en konpetisyon ant bann distrik pour ganny en pri larzan me son vre bi se pour donn tou Seselwa dan tou distrik, enkli Praslin ek La Digue,  sans pour kontribye e partisip dan prezervasyon son prop leritaz kiltirel dan son prop distrik.

«I annan en varyete posibilite devan nou dan sak distrik pour nou partisip dan sa proze ki osi kapab kre lanplwa e anmenn en pti reveni atraver bann aktivite ki nou organize. Me sa pri i osi ofer en sans pour tou zabitan distrik zwenn ansanm, partaz lide, met zefor ek letan ansanm pour zot determinen dan ki fason zot pou kapab kontribye dan devlopman zot distrik lo en baz non selman kiltirel me osi lo en baz biznes,» Minis St Ange ti dir.

Envite pe regard en performans ladans pandan seremoni lansman konkour Pri Distik Kiltirel