Lungos i demann bann zonm pour revwar fason zot pe viv dan zot fanmir |30 November 2013

Pour premye fwa Younit Lyezon bann Lorganizasyon Non-Gouvernmantal (Lungos) ti sa semenn organiz en pti rankont pour bann zonm pour komemor zot lazournen ki ti ganny selebre pli boner sa mwan e sa ti deroul kot son biro Orion Mall.

Sa aktivite ti enkli en refleksyon par Paster Michael Bijoux sorti legliz Advantis lo tenm swazir pour lazournen bann zonm sa lannen ki ‘Gard Zonm ek Garson Sen e Sof’, resital en poenm lo sa size par Tony Joubert alyas ‘Raspyek’, en kozri lo lasante bann zonm par Madanm Gina Michel, en ners, e osi en prezantasyon par Msye Benjamin Vel, en konsiltan, lo zonm, zot relasyon e fason zot kominike avek bann madanm e osi zot rol dan lafanmir e dan sosyete.

Responsab Lungos Madanm Marie-Nella Azemia i dir ki sa aktivite ki Lungos in organize i tre enportan akoz Lungos i deza annan en bon pe zonm ki pe fer kontribisyon enportan dan diferan lasosyasyon ki zot manm e sa akote bann madanm, alors sa aktivite pour selebre sa bann zonm i apropriye e i en siny lankourazman pour zot.

«Fodre pa nou oubliye ki en zonm i annan en tre gran valer dan son legzistans lo later e prezans en zonm dan en fanmir i esansyel e bann zonm zot devret gard antet ki rol en fanm ek en zonm serye dan en maryaz oubyen menaz i fer ki nou ava annan bann fanmir solid lo ki en sosyete i depan,» Madanm Azemia ti dir.

«Zonm annou pa gete kwa ki lezot zonm pe fer me plito annou reflesir lo sa ki mwan koman en zonm mon kapab fer pli byen pour fer grandi mon fanmir, revwar mon bann aksyon ki promouvwar mon lasante ek lasante mon fanmir e kwa ki mon devret fer anplis pour kontribye ver zot prosperite e prosperite pei,» Madanm Azemia ti azoute.

I ti dir ki parmi son bann lobzektif Lungos i oule donn plis konnesans son bann manm e sa i atraver formasyon e osi bann progranm aktivite dan kwa i espere bokou plis zonm ava vin devan pour partisipe.

I ti lans lapel avek bann lasosyasyon sosyete sivil pour travay pli for avek bann zonm pour ed zot promouvwar zot valer koman zonm e anrisir zot lavi ek lavi zot fanmir, zot lavi travay e lezot ankor.

«I annan bokou bon verti ki si nou met an pratik nou pou arive viv vre lanmour e ganny lape,» i ti fer resorti.

«Nenport kwa ki zot esey fer, en aksyon pli senp posib, annou fer li avek bi pour vin en role model pour lezot,» i ti azoute.

I ti demann bann zonm pour fer bann bon desizyon ki pou ed zot avans pli devan dan zot lavi e demann bann ki donn zot letan volonterman dan bann diferan lasoyasyon pour zot ankouraz lezot zonm pour vin partisip dan sa bann travay lasosyete sivil.