Dimoun avek dezabilite i ganny ankouraze pour servi plis zot abilite |30 November 2013
Bann dimoun avek dezabilite in ganny ankouraze pour zot servi plis zot abilite dan zot lavi toulezour.
Sa ti en pwen for ki sekreter egzektif konsey bann dimoun avek dezabilite, Madanm Celine Fanchette, ti fer resorti yer pandan ki i ti pe adres bann prezan kot seremoni ofisyel lazournen port- ouver kot sant reabilitasyon North East Point.
Parmi bann ki ti prezan ti Patronn sa konsey Madanm Sarah Rene, sekreter prensipal pour zafer sosyal Linda William-Melanie, tyermenn sa konsey Patricia Rene, bann paran, etidyan e travayer sa sant.
Tyermenn konsey, Madanm Rene, in dir ki sa legzibisyon e lazournen port-ouver i de parmi en seri aktivite ki pou ganny fer pour mark lazournen enternasyonal pour dimoun avek dezabilite le 3 Desanm.
I ti fer resorti ki i enportan ki nou reflesir lo nou rol dan lavi sa bann dimoun avek dezabilite e ki nou annan konfyans dan zot potansyel.
E vreman sa bann zenn kot sa sant ti montre zot potansyel dan bann performans artistik tel ki ladans e sanson ki ti ganny byen apresye par bann ki ti prezan kot sa seremoni.
Lo non tou paran, tyermenn komite paran Marie-Annette Ernesta ti remersye bann lenstrikter e lezot travayer sa sant ki devoue anver ledikasyon sa bann etidyan sa sant.
I ti osi remersye gouvernman pour touzour met bann dimoun avek dezabilite lo son azanda.
Apre seremoni ofisyel, Madanm Sarah Rene ti ganny loner pour plant en pye dibwa dan zarden sa sant koman en zes senbolik pour sa levennman.
Bann envite e etidyan ti answit vizit bann egzibit dan en legzibisyon ki ti pe montre bann travay e lakonplisman bann etidyan sa sant.
Madanm Fanchette in dir ki an zeneral lannen in al byen kot sant e sa legzibisyon i laprev lakonplisman sa bann etidyan.
I ti fer resorti ki bann paran in byen korpere e montre lentere dan ledikasyon zot zanfan me i touzour annan en minorite ki devre fer plis zefor pour partisip dan ledikasyon zot zanfan.
Pour lannen prosen, in azoute ki konsey pour al anbark lo sa progranm TVET (Technical Vocational Education and Training) e komans travay lo donn kapasite bann lenstrikster lo sa progranm.