Oli gratitid? |04 December 2013

Mon ti a vreman apresye si ou ti kapab pibliy sa de mo dan zournal Nasyon.

Ti avek en gran lentere ki mon ti swiv nouvel lo Tribinal Lafanmiy e osi lir dan zournal Nasyon le 28 Novanm deroulman alokazyon son 15enm lanniverser.

Mon rapel tre byen koman enn sa manm ki ti ganny sa loportinite pour fer parti sa premye group 15 dimoun apwente par ansyen Minis Herminie ki ti responsab sa departman sa letan pour asiz lo sa premye sesyon travay le 28 Novanm 1998. E sa ti kontinyen tou le semenn pandan en bon pe lannen apre.

Nou souvan annan tandans pour oubliye ki i bezwen touzour sa premye group ki annan lodas e oze pour form parti okenn proze ki komanse dan nou pei e apre i bezwen annan lezot pour kontinyen.
Pour mwan koman enn sa manm ti en gran loner e en privilez pour aksepte pour from parti sa premye group dimoun ki ti demar sa proze.

Erezman i annan lafanmiy ki ankor rekonesan ziska ozordi e zot pa oubliy lepase. Parey dikton i dir, ler ou fer sa ki byen ou ganny oubliye me zistwar i kontinyen, i pa reekri.
Mon pran sa lokazyon pour remersye tou le 15 manm ki ti form parti e ti fondater premye Tribinal Lafanmiy dan Sesel.

B. Socrate (Madanm)