En moman detant ek refleksyon pour bann veteran Parti Lepep Mont Buxton |06 December 2013
Ti en Dimans tre kalm dan distrik Mont Buxton letan ki lekip Seychelles Nation ti ariv kot sant kominoter e zanmen nou ti a dir ki ti annan en fonksyon tre spesyal pe deroule.
En dekor tre senp, en ler lanmizik dous ti ase pour kree en latmosfer detant pour en group veteran Parti Lepep dan sa distrik ki ti’n rankontre atraver en dezennen pour selebre lanniverser bann ki’n ganny zot laz ant mwan Out ziska Desanm.
Minis Dezinyen Vincent Meriton, ki manm konmite santral pour sa distrik, manm Lasanble Nasyonal pour Mont Buxton Sheryl Vengadasamy, ladministrater distrik Michelle Sabury e tyermenn komite veteran pour sa distrik Donald Celestine ti parmi bann prezan kot sa rankont.
Pandan ki i ti pe adres bann envite, Minis Meriton ti dir ki bann tel rankont parey i enportan akoz i anmenn bann veteran sa parti ansanm kot zot kapab esanz pwennvi, lide e osi bann refleksyon, ensi byen ki anmiz ansanm.
I ti fer resorti ki en sosyete i ganny zize lo fason ki i tret son bann dimoun aze e ki i enportan ki nou remersye e montre zot respe.
I ti azoute ki i osi enportan ki sa bann dimoun aze i pas zot bann konnesans ek leksperyans avek nou bann zenn e gid zot lo sa bon semen lavi.
Lo son kote Manmzel Vengadasamy ti dir ki sa rankont i en fason pour valoriz nou bann dimoun aze ki’n kontribye bokou dan devlopman nou pei.
I ti dir ki pei i apresye zot sipor ek kontribisyon anver devlopman lasosyete.
Msye Celestine in dir ki son group veteran dan distrik i aktiv e ansanm zot in organiz bokou aktivite, e atraver bann aktivite zot ganny sans konn plis lo devlopman dan Sesel.
I ti dir ki lannen prosen, group veteran ek group lazenes i annan lide zwenn ansanm dan en rankont enterzenerasyon pour esanz lide e met byennet distrik e osi byen ki pei alavan.
Msye Celestine in dir ki atraver bann aktivite ki zot pou organize, group veteran pou vin pli pre avek lazenes sa distrik, pour travay ansanm pour ede fer Mont Buxton devlope e konn ankor plis sikse.