Nouvo formasyon pour fer travay home carers pli profesyonnel |12 December 2013
Bann home carers ki pran swen avek bann dimoun aze, bann dimoun ki malad ouswa bann ki annan en dezabilite kot lakour pou swiv en formasyon an Zanvye avek bi profesyonaliz zot travay e ofer en meyer servis.
Sef egzekitif Lazans Proteksyon Sosyal Wallace Cosgrow ti donn medya plis detay lo sa formasyon apre vizit ki i ti fer ansanm avek Minis pour Zafer Sosyal, Devlopman Kominoter ek Spor Vincent Meriton sa semenn dan distrik Pointe Larue pour evalye amelyorasyon dan servis home care ki pe ganny ofer dan sa distrik.
Msye Cosgrow in dir ki bann carer ki pe ofer sa servis dan bann lenstitisyon tel ki Foyer de la Providence, bann rezidans dimoun aze e menm bann zofisye home care santral, bann direkter ek lezot zofisye ki fer swivi in deza swiv en tel formasyon.
I ti fer resorti ki sa formasyon pou ganny fer par faz vi ki i annan bokou carer ki pe ofer en tel servis e sa pou ganny fer par distrik e par rezyon.
Msye Cosgrow ti dir ki formasyon pour bann home carers ti ganny idantifye pandan en letid lo servis home care ki ti ganny fer sa lannen par Lazans Proteksyon Sosyal.
« Ti annan serten rekomandasyon ki ti resorti dan sa letid pour ki bann carer i ganny en pti pe plis formasyon lo sa louvraz ki zot pe fer, lo ki fason pour pran swen avek bann aze, bann ki malad e menm bann zenn ki annan dezabilite ki zot travay avek, » i ti dir.
Msye Cosgrow in azoute ki gouvernman in osi pran sa linisyativ pour ofer sa formasyon.
« I annan bokou carer, alors i neseser ki nou asire ki sa formasyon i ganny fer byen e ki target byen bezwen sa bann carer, » i ti dir.
I ti azoute ki sa formasyon de a trwa zour pou montre sa bann endividi labaz lo kimannyer pour pran swen avek bann dimoun, fason pour administre latizann ek lezot laspe zot travay.
« Atraver sa letid nou ti osi realize ki i annan bann carer ki annan ledikasyon ziska nivo pos-segonder e menm NYS alors nou’n fer sa formasyon ki i pa tro bokou pour zot me ki i lo en nivo ki zot bezwen, » i ti dir.