Minis Meriton i evalye servis home care dan distrik Pointe Larue |12 December 2013

Minis responsab pour Zafer Sosyal, Devlopman Kominoter ek Spor Vincent Meriton in vizit rezidans bann dimoun aze dan distrik Pointe Larue sa semenn pour vwar nivo ek kalite servis ki zot pe gannyen e osi pour koz avek bann rezidan lo sa size.

I annan de carer ki atase avek sa 13 dimoun aze dan sa rezidans ki ganny administre par Gilberte Adela.

Minis Meriton in osi koz avek sa bann rezidan lo formasyon ki bann carer pou gannyen pour profesyonaliz travay ki zot fer e an retour donn en meyer servis bann ki servi en tel servis.

I ti osi lans lapel avek bann manm fanmiy sa bann dimoun aze dan sa rezidans pour pa zet zot me pour okontrer vizit zot pli souvan e donn zot sipor.

Minis Meriton ti osi koz lo logmansyon R200 ki’n ganny anonse dan bidze lo larzan ki bann dimoun aze i gannyen pour vin R2950, pour ed zot kapab fer en pti kontribisyon kot rezidans e osi servi li pour zot prop bezwen.

I ti azoute ki lapey bann carer in osi ogmante pour fer li vin menm nivo avek minimum wage.

Sa vizit kot sa rezidans ti osi letan pour bann rezidan demann kestyon minis ek son delegasyon.

Minis Meriton ti akonpannyen lo son vizit par sef egzekitif Lazans pour Proteksyon Sosyal Wallace Cosgrow ek zofisye sa lazans.

Osi prezan kot sa rankont ti direkter bann lakour dimoun aze Sylvia Stravens osi byen ki ladministrater sa distrik Julita Adela.

An sortan kot sa rezidans, minis ek son delegasyon ti kontiny zot vizit kot lakour Madanm Julia Morel, enn bann zabitan sa distrik ki annan en home carer dan lazournen avek li.

I ti eksprim son satisfaksyon avek nivo servis ki son home carer i donnen e i ti profite pour koz avek minis lo enn de pti pwen konsern.


Lot dimoun aze ki Minis Meriton ti vizite ti Msye Lovette Dick ki reste Anse Des Genets ki’n osi dir ki i satisfe avek servis ki i gannyen.

Pandan ki i ti pe koz avek zournalis apre son vizit, Minis Meriton ti dir ki son vizit i dan kad bann vizit pour get bann proze ek bann lenstitisyon ki tonm anba son minister.

“Sa enn vizit ti pour ganny en apersi lo amelyorasyon dan performans bann carers kot zot donn swen bann dimoun aze, » i ti dir.

« Avek bidze 2014, gouvernman in reafirm son langazman pour bann dimoun aze atraver logmantasyon zot pansyon e osi pour bann carer ek lezot mezir ki pe ganny pran. »

Sa i montre ki gouvernman i reste fidel avek son polisi met dimoun aze o sant devlopman, i ti azoute.

Minis Meriton in dir ki i satisfe avek sa ki in trouve pandan son vizit me i touzour annan plas pour amelyorasyon.