Diskour Bidze 2014 |14 December 2013

Gouvernman pou entansifye lalit kont fo prodwi

Dan son demars pour anpese ki bann prodwi ki fo e pa lo standar tel parey lalkol ek lavyann i antre dan pei gouvernman i ansemoman pe fer demars pour aste 2 masin ki kapab determin lorizinalite ek otantisite sa bann prodwi.

Dimoun ki ganny atrape pe vann sa bann fo prodwi ek labwason pou ganny prosekite.

Minis responsab pour Finans, Komers ek Lenvestisman Pierre Laporte ti fer sa lanons sa semenn ler i ti prezant Bidze pour 2014.

Minis Laporte ti dir ki nou bezwen asire ki kalite lavyann ek lezot prodwi alimanter ki enporte i satisfer pli o standar enternasyonal.
 
«Nou dan premye letap pour aste en masin ki ava asiste bann lenspekter lokal pour etabli kalite bann prodwi ki enporte. Nou osi espere ki sa mezir ava ede anmenn serten proteksyon pour bann prodikter lokal ,» Minis Laporte ti fer resorti.

Touzour an sa ki konsern bann komodite ek prodwi ki pei i enporte Minis Laporte ti dir ki

Seychelles Trading Company (STC) ki’n kontinyen gard pri bann komodite esansyel pli ba ki posib e ki’n osi kontinyen abzorb kou transportasyon bann komodite de baz lo bann zil pros pour asir konsistans dan pri avek Mahé, pou ouver en nouvo cold store lo La Digue avan lafen lannen e en laboutik an Zanvye lannen prosenn.

Sa i swiv louvertir son nouvo brans lo Praslin pli boner sa lannen.

STC pou osi agrandi son rezo distribisyon avek en nouvo sipermarse Grand Anse, Mahé an Mars lannen prosenn e Minis Laporte ti osi dir ki STC i ankor pe rod en landrwa Anse Royale pour ouver en nouvo brans.

«STC i osi annan plan ouver en depo pour materyo konstriksyon an Fevriye 2014 e i osi a en staz avanse dan diskisyon avek SSI pour ouver en dezyenm sipermarse kot propriete ex-Cassis,» Minis Laporte ti dir. Propriete ex-Cassis i trouve lo semen Bois de Rose.