Nouvo progranm pour promot bon valer dan sosyete |17 December 2013

Departman Lazenes an kolaborasyon avek Konsey Nasyonal pour Lazenes pou aparti lannen prosen enplimant en progranm apele ‘Valer pour mwan, valer pour nou tou’.

Se Vis-Prezidan Danny Faure ki ti fer sa lanons Vandredi swar pandan seremoni Youth Award 2013 ki ti deroul kot Sant Konferans Enternasyonal.

Sa seremoni ti ganny asiste par bann minis, sekreter prensipal, sef egzektif sa konsey Vicky Van der Westhuizen e plizyer o zofisye gouvernman ensi byen ki bann zenn.

Vis-Prezidan Faure ti dir ki sa progranm pou enn nasyonal ki pou ganny realize avek Minister Ledikasyon e osi byen ki lezot partener.

« Ansanm avek Minister Ledikasyon, nou bezwen kontinyen trouv fason pour nou epwiz tou bann potansyel ki sak zanfan i annan. Nou fer li akoz nou vreman anvi ki lazenes Seselwa i realiz tou zot potansyel, » i ti dir.

« Sa i a garanti ki Sesel i al pli lwen ankor e i ava devlop bokou plis ankor, » i ti azoute.

« Fas a bann lobstak, distraksyon, tantasyon ek negativite ki nou bann zenn i rankontre dan zot semen lavi, enn bann mwayen defans se pour annan dan nou zenn bann valer ki zot a kapab servi koman zot konpa, » Vis-Prezidan Faure ti dir.

« Dan en lemonn ki pe sanze, e ki pe sanz vit, dan en Sesel ki pe devlope e pe devlop vit, nou bann zenn i bezwen annan en karakter ki baze lo bann bon valer. »

Pandan ki i ti pe koz avek medya lo sa progranm, Madanm Van der Westhuizen ti dir ki i pe ganny fer avek bann diferan partener tel ki Minister Ledikasyon, Lanplwa ek Lasante akoz i pou en progranm ki pou tous pa zis lazenes me lasosyete an zeneral.

« I en progranm ki pou en dirasyon trwa-z-an e ki apre nou pou mezire, » i ti dir.

« Tou le mwan, nou’n swazir en valer ki nou kwar i enportan e ki nou bewen ranforsi e viv li toulezour. »

Pour mwan Zanvye, valer ki’n ganny swazir i determinasyon e bann aktivite ki pou ganny organize pou konsantre otour sa valer.

Madanm Van der Westhuizen in dir ki bann zanfan lekol pou ganny sans viv sa bann valer atraver zot letid, aktivite lwazir e sosyal.

I ti dir i enportan ki bann landrwa travay i osi pran linisyativ pour organiz bann aktivite ki pou reflekte sa bann valer.