Sidney Jacques i selebre son 100enm lanniverser |17 December 2013

Vandredi le 13 Desanm ti en zour tre spesyal pour Sidney Jacques, son bann zanfan, lezot manm fanmiy ek zanmi.

Sa i akoz Msye Jacques ti sa zour selebre son 100enm lanniverser, en levennman ki pa bokou endividi i ganny sans viv.

Son bann zanfan, fanmiy pros ek zanmi ti’n rasanble kot School Meal Centre Ile Perseverance sa zour apremidi pour selebre sa lokazyon tre spesyal.

Landrwa kot seremoni ti pe fer ti’n byen dekore e tou ti komans avek en lanmes prezide par Per Pierre sorti dan parwas Ste Thérèse Plaisance.

Minis Dezinyen Vincent Meriton, ki osi responsab Minister Zafer Sosyal, Devlopman Kominoter ek Spor, ti prezan kot sa seremoni.

Dan son pti ladres pour sa seremoni, Minis Meriton ti dir ki lavi i en keksoz ki nou devret valorize e i devret ganny apresye.

I ti azoute ki lanniverser sa santener i en lafet lavi ek lanmour.

Minis Meriton ti felisit Msye Jacques e lo lapar Prezidan James Michel, i ti prezant li avek en pannyen ranpli avek bann bon keksoz ki pou ede gard li an bonn sante.

Msye Jacques, ki annan li sis zanfan, in vin pli vye zonm dan distrik Plaisance kot i reste.