Follow us on:

Facebook Twitter LinkedIn YouTube

Archive -Seychelles

Dimoun avek problenm tande i demontre zot abilite |18 December 2013

Bann dimoun ki annan problenm tande pe demontre zot potansyel ek abilite dan en seri aktivite ki pe deroul toudilon sa semenn anba tenm ‘Dimoun sourd an aksyon’.

Lansman ofisyel sa lasemenn ti fer Sanmdi pase kot biro Younit lyezon pour bann lorganizasyon non-gouvernmantal (Lungos) dan prezans Minis Dezinyen Vincent Meriton, sekreter prensipal pour zafer sosyal Linda William-Melanie e plizyer lezot envite.

Premye aktivite ti deroul Sanmdi bomaten menm kot ti annan en legzibisyon ek lavant travay artizanal ek demonstrasyon masaz fer par bann dimoun ki annan problenm tande.

Lezot aktivite i enkli lavant snacks fer par bann ki’n termin zot training dan fer bann pti snacks sorti La Digue osi byen ki Mahé. Aktivite ranmas larzan dan lavil pandan lasemenn i osi lo progranm.

Dimans pou annan en lazournen sportif lo lans Beau Vallon ki pou demar avek en lamars depi kot bazar anvil aparti 7er bomaten.

Pandan ki i ti pe adres bann prezan pandan seremoni lansman Sanmdi, Minis Meriton ti dir ki sa lasemenn i enn ki pou anmenn plis ledikasyon lo bann dimoun ki annan problenm tande, lo zot bann defi e lakonplisman.

I ti azoute ki bann dimoun avek problenm tande pa pe rod pitye me okontrer zot demann ganny rekonnesans ek konprenezon.

Minis Meriton ti fer resorti ki dezabilite fizik pa devret en lanpesman pour viv zot lavi.

I ti dir ki sa lasemenn i fer rapel ki nou pe viv dan en monn kot personn pa parfe e kot nou devret viv bann bon valer.

Pandan sa seremoni bann dimoun avek problenm tande ki’n swiv en formasyon sis mwan lo Konvansyon drwa dimoun avek dezabilite ti ganny remet avek zot sertifika.

Bann dimoun avek problenm tande lo La Digue ki’n ganny formasyon lo ki mannyer pour fer snacks tipikman lokal e apre vann lo zot bisiklet 3 larou ti osi resevwar zot sertifika.

Parmi bann ki ti osi resevwar sertifika ti en group zenn ki ti’n swiv formasyon dan fer masaz kot La Jeunesse Beauty Salon anba proze Silent Touch.

Bann zelev ki pe swiv laklas kot lekol Au Cap in osi ganny prezante avek kado e bann ki’n fer plis zefor e pli byen pandan lannen ti osi ganny rekonpanse.

Christie Celestine, ki’n termin son lekol e ki pe swiv en formasyon depi lannen pase pour vin en ansennyan pour bann zanfan avek problenm tande, ti osi ganny prezante avek bann dimoun ki ti la prezan e i ti osi ganny en pti kado avek sa de lezot ansennyan – Shireen Guy ek Shana David.

Lezot ki ti resevwar pri ti John Athanase koman atlet dan lasosyasyon deaf sports ki’n fer plis zefor, Samia Leon koman best achiever of the year e Heather Arnaud koman deaf of the year.

An memwar premye Prezidan lasosyasyon spor pour bann dimoun avek problenm tande, Rene Barbe, en pri apele Rene Barbe Award i ganny donnen avek en dimoun ki’n fer gran kontribisyon dan travay lasosyasyon dimoun ki annan problenm tande. Sa lannen sa pri in al pour Medgée Morgan.

» Back to Archive