Lapolis i ranforsi patrol pandan sezon festivite |19 December 2013

Nwel ek Lannen i de lafet ki touzour anmenn fanmir ek zanmi ansanm dan en latmosfer ranpli avek lazwa. Me, souvan parey granmoun i dir «maler pa averti». Se pour anpese ki serten fanmir i pas bann moman festivite dan lapenn ki lapolis pe ogmant son patrol e deplway tou son bann zofisye pour sa mwan Desanm.

Komisyoner Lapolis Ernest Quatre ti annons plan ki lafors lapolis i annan pour sa sezon festivite dan en konferans lapres yer. Osi prezan ti Sef Sirentandan Phillipe Cecile ki sef loperasyon lapolis e Asistan Sirentandan Wilson Denis ki ansarz seksyon trafik.

«Dan sa moman festivite avek bokou dimoun ki pe desann anvil e bann ki pe deplase e kit zot lakaz tousel nou’n fer en plan travay ki pou tous kriminalite ek trafik,» Komisyoner Quatre ti dir.

«Sa plan-d-aksyon pour sa mwan Desanm pe ganny aplike lo Mahé e osi byen ki Praslin ek La Digue,» i ti azoute.

Laplipar dimoun i get lanmizik konman en konponan esansyel dan en parti oubyen okenn lanmizman. Komisyoner Quatre ti profite pour konsey manm piblik pour respekte ler ki ganny delege pour zwe zot lanmizik for.

Komisyoner Quatre ti azoute ki pour lapolis kapab ranforsi patrol tou son bann zofisye pou bezwen travay pandan sa mwan Desanm, e sa i enkli bann zenn ki fek zwenn lafors lapolis e ki pe swiv letid kot Lakademi Lapolis.

«Sa bann zenn in swiv zot letid kot lakademi e zot in resevwar teknik ek formasyon konman pour reakte dan okenn sitiasyon ki zot fer fas avek. E sa moman la i letan kot zot pou pe ganny leksperyans pour zot letid,» i ti dir.

Msye Quatre ti fer resorti ki sa bann zenn pou ganny akonpannyen par bann serzan ki tonm anba progranm zenn dirizan.

A son tour, Sef Sirentandan Cecile ti eksplike ki fason loperasyon dan bann stasyon pou marse. «Nou pe entansifye prezans lapolis dan lavil osi byen ki dan lakanpanny. Nou pou annan plis patrol dan lavil, nou pou annan patrol mobil dan distrik partou ki pou kabab rann lapel manm piblik dan en dele letan pli kourt,» Sef Sirentandan Cecile ti dir.

E lo kote trafik, Asistan Sirentandan Denis ti dir ki zot pe ogmant zot bann spot check ki zot fer lo drayver.
 
«Nou pe entansifye spot check pour asire ki tou drayver ek pyeton i swiv regilasyon trafik. Nou pe ankouraz tou drayver pour pa servi telefonn portab ler zot pe dray,» Asistan Sirentandan Denis ti dir.

I ti osi azoute ki bokou dimoun i kontan konsonm labwason alkolize pandan sa moman festivite e i konsey bann drayver pour rod en lot drayver oubyen en lot fason deplase letan ki zot pe konsonm labwason alkolize.

Sef Sirentandan Cecile in lo son par demann bann manm piblik pour respekte lalwa e pa konsonm labwason alkolize dan bann landrwa piblik.

Komisyoner Quatre ti osi profite pandan sa konferans pour anonse ki zot pe travay lo statistik krim ek aksidan trafik dan Sesel depi lannen 2009 ziska ozordi.

Zournal Nasyon i ekspekte ekrir en lartik detaye lo sa bann statistik dan enn son prosen edisyon.