Lungos i ekspekte ganny nouvo rol an 2014 |19 December 2013

Younit lyezon pour bann lorganizasyon non-gouvernmantal (Lungos) i ekspekte ganny dizourd lannen prosen pour li vin en platform sosyete sivil.

Sa pou fer li vin anliny avek standar bann pei ki manm Kominote Devlopman Sid Lafrik (SADC).

Tyermenn Lungos, Marie-Nella Azemia, ti fer sa resorti pandan miting zeneral anyel sa lorganizasyon ki ti deroul kot sant konferans STC Sanmdi pase.

Avan ki sa miting ti komanse bann ki ti prezan ti rezerv en minit silans an siny respe ansyen Prezidan Sid Afriken Nelson Mandela ki’n mor resaman.

Pandan sa miting, en rapor lo performans Lungos ti ganny prezante ensi ki rapor oditer e sa ki pour tyermenn.

Dan son rapor, Madanm Azemia ti fer resorti ki enn son lobzektif se pour anmenn Lungos lo en lot nivo e ki pandan sa lannen en kantite devlopman in ganny fer an term bann travay kontinyel ki manm bord avan sa enn ti pe fer.

Bann komisyon ki regroup bann lorganizasyon non-gouvernmantal in fer pandan sa lannen ti osi prezant rapor.

Dan son rapor, Madanm Azemia ti osi koz lo bann reorganizasyon entern dan sekretaryat Lungos tel ki en komite finans ki’n ganny met an plas.

Avek bi pour onor bann volonter e osi atir plis volonter dan sekter non-gouvernmantal, en Volunteer Recognition Award pe ganny devlope.

Bann manm Lungos ti osi adopte rapor oditer pandan sa miting e apwent lakonpannyen Bhanderi and Co koman oditer pour lannen prosen.

Bann manm Lungos pandan miting zeneral Sanmdi