Mesaz Lider PDM a lokazyon Nwel 2013 |24 December 2013

‘Annou viv sa vre mesaz lanmour ki Nwel i sinifye’

Lider PDM (Mouvman Demokratik Popiler) David Pierre in demann tou Seselwa pour fer en refleksyon spirityel profon pour vwar si nou pe vreman viv sa vre mesaz lanmour ki Nwel i sinifye, e rode kote e ki mannyer nou kapab met plis zefor pour partaz nou lazwa ek sa mesaz respe, tolerans ek lape parmi nou tou.

Sa lapel i vin dan en mesaz ki Msye Pierre in anvoye a lokazyon Nwel 2013.

Teks entegral mesaz Msye Pierre i lir koumsa :

“Mon bann frer ek ser Seselwa,

“Sa letan tre spesyal dan lannen in ariv ankor.

“Nwel i touzour anmenn en serten lazwa, en serten sans konfor ek lape.

“I sa moman dan lannen kot nou pli pare pour oubliye, pour rekonsilye e pour pardonnen.

“Koman en pep nou’n toultan gard sa lespri lapartaz ek lanmour ki touzour asosye avek Nwel. Fodre a tou pri nou kontinyen gard sa bon valer, ki nou kontinyen zet en regar lo nou prosen e anvoy en lanmen pour nou ed kanmarad.

 “Pli gran lafors Nwel i pa dan bann kado ni dan bann bon swe me i sa konfyans ek krwayans ki nou koman en pep kretyen nou annan dan Bon Dye. Sa lokazyon i komemor son nesans, en nesans ki’n anmenn en nouvo mesaz lanmour ek lape pour limanite. Nou bezwen fer en refleksyon spirityel profon pour vwar sakenn antre nou si nou pe vreman viv sa vre mesaz lanmour ki Nwel i sinifye, e rode kote e ki mannyer nou kapab met plis zefor pour partaz nou lazwa ek sa mesaz respe, tolerans ek lape parmi nou tou.

“Isi Sesel malgre tou problenm ki nou kapab annan, nou ankor en pei beni e lamazorite nou pep i annan en pla pour manze toulezour. Malerezman i annan de milye dimoun ki ankor, pour sa Nwel, pou retrouv zot lafen, zot pou swaf, e zot pou napa ni menm en twa lo zot latet.

“Alors, kan nou asiz avek nou fanmir annou zet en panse pour sa bann dimoun ki mwen fortinen, ki swa zot isi Sesel oubyen zot ayer. Anplis, annou gard nou sans linite e annou priye ki en zour lemonn antye ava anpe.

“Mon fanmir ek mwan menm, nou swet tou Seselwa en tre zwaye lafet Nwel e ki Bondye i a kontinyen beni nou ek nou pei Sesel.
“Mersi.”