Lafet Nwel i konmans boner pour bann pti zanfan distrik Mont Buxton |24 December 2013

Sa bouncy castle ki ti’n ganny enstale dan zarden sant kominoter Mont Buxton, bann sanson popiler ki ti pe ganny zwe e en dekorasyon tre kolore, tou ti donn lendikasyon ki ti annan keksoz tre spesyal ki ti pe deroule kot sa sant.

Bann zanfan aze ant 2-an a 4-an ti’n byen abiye e ti pe fer zot larantre kot sant ler nou lekip ti ariv laba yer apremidi.

Akonpannyen par bann zanfan pli gran ou menm zot paran, zot ti ganny akeir par ladministrater sa distrik Michelle Sabury.

Dan lasal tou ti’n pare pour zot, e bann kado ki zot ti pou resevwar apre ti’n ganny byen aranze e serten bann zanfan ti sitan enterese avek sa pti kwen ki mon prezimen zot ti kirye pour konnen ki Bonnonm Nwel ti’n anpakte pour zot.

Deor Bonnonm Nwel ti pe anmize dan bouncy castle avek serten bann zanfan.

Ti osi annan en kwen face painting kot bann zanfan ti pe fer bann desen lo zot figir an servan bann lapentir spesyal.

E byensir avan bann zanfan ti ale, Bonnonm Nwel ti fer sir ki sakenn i retourn dan lakour avek en pti kado, e lekip Seychelles Nation osi pa ti’n ganny bliye lo sa lalis!