Follow us on:

Facebook Twitter LinkedIn YouTube

Archive -Seychelles

Bann dimoun avek dezabilite Au Cap i zwenn dan en dezennen |03 January 2014

Distrik Au Cap ti organiz en rankont pour bann dimoun sa distrik ki pe viv avek en dezabilite.

Sa dezennen, ki ti ganny sponsor par Seychelles Petroleum Company (Sepec), ti fer dan Mission Cafeteria Anse Royale Dimans le 29 Desanm, 2013.

Prezan dan sa rankont ti Minis pour Lanvironnman ek Lenerzi Profeser Rolph Payet, ki osi manm komite santral Parti Lepep pour distrik Au Cap, manm Lasanble Nasyonal distrik  Au Cap Onorab Murielle Marie, administrater distrik Doris Esther, staf Sepec, bann manm volonter sa distrik, bann dimoun ki pe viv avek en dezabilite e bann paran.

Vi ki bann ki pe viv avek en dezabilite ti bann envite doner zot ti ganny akeyir avek en kolye fler ler zot ti arive.

« Mon tre apresye ki kantmen zot pe viv avek en dezabilite, zot in fer sa zefor spesyal pour vin isi pour zot selebre akoz sa lokazyon i ganny organize zis pour zot, » Profeser Payet ti dir.

I ti osi profite pour swet tou bann ki ti prezan en nouvo lannen ranpli avek bokou lespwar.

Onorab Marie ti remersye Sepec pour son zes saritab pour distrik Au Cap.

« Mon oule osi profite pour remersye tou bann dimoun dan mon distrik ki ede dan en fason ou en lot pour fer nou distrik bouz devan, » Onorab Marie ti azoute.

Dan sa dezennen ti osi annan annan en DJ ki ti pe met lanbyans lannen e tou bann dimoun ki ti prezan ti byen apresye zot lazournen.

» Back to Archive