Dimoun aze Pointe Larue i selebre nouvo lannen |04 January 2014

Rezidan kot lakaz dimoun aze Pointe Larue ek en group trwazyenm-az dan distrik ti zwenn dan en rankont yer pour selebre larive sa nouvo lannen.

Sa rankont ti deroul dan prezans manm komite santral Parti Lepep pour sa distrik, Wills Agricole, direktris bann rezidans dimoun aze dan pei Sylvia Stravens, ladministrater distrik Pointe Larue Julita Adela, dirktris rezidans dimoun aze Pointe Larue Gilberte Adela ek bann travayer sa rezidans.

Aktivite ti konmans avek en benediksyon par Reveran Christine Benoit sorti dan dyosez Anglikann. Bann envite ti ganny sans pour sant bann kantik Nwel tel ki «Il  est né le divine enfant » parmi lezot ankor.

« Mon oule swet zot tou isi prezan en bon lannen e mon oule ki zot pa ezite pour vin rod mon sipor e lasistans kan zot bezwen, » Msye Agricole ti dir.

I ti osi profite pour remersye bann dimoun aze pour zot sipor e led ki zot in fer dan lepase e i ti osi swete ki 2014 i a pli meyer ki 2013.

Manmzel Stravens osi ti profite pour swet bann ki ti prezan en bon lannen e i ti osi azoute : « Mon oule ki zot bann dimoun aze zot rekonnet e apresye travay ki bann carer i fer pour zot. Nou konnen ki a en serten pwen dan lavi bann ki aze zot annan zot pti kapris me sa pa devret anpes zot annan respe pour sa bann ki pe travay avek zot. »

Manmzel Adela ti remersye tou bann ki’n ede pour realiz sa aktivite. « Mon swete ki bann sipor ki nou rezidan in gannyen pandan lannen 2013 nou a kontinyen gannyen pandan sa lannen ki la. »

Apre ki tou bann remersiman ti’n ganny fer bann ki ti prezan ti angaz zot dan bann dyalog pour rakont lavi lontan pandan ki zot ti pe pran en pti rafresisman. E plitar bann ki ti kapab ti degourdi zot lazanm avek lanmizik ki ti pe ganny zwe pour egey zot dan zot aktivite.