Lofis Oditer Zeneral i koz lo bann kont ki pa ti ankor annord |06 January 2014

Lofis Oditer Zeneral in konfirmen ki travay lodit lo kont National Information Services Agency (Nisa) pe al ganny fer sa semenn, apre ki sa lazans ti enn parmi sa trwa ki pa ti ankor met zot kont annord pour lannen 2013.

Sa trwa lantrepriz piblik ki Minis Finans, Komers ek Lenvestisman Pierre Laporte ti koz lo la pandan son diskour bidze dan Lasanble Nasyonal i L’Union Estate, Nisa ek Sociétée Seychelloise d'Investissement.

Oditer Zeneral Marc Benstrong in dir ki L’Union Estate ek Sociétée Seychelloise d'Investissement ti pe fer en restriktirasyon entern pandan 2013 e sa i enn bann rezon ki’n fer ki zot pa’n kapab fer zot kont ganny odite pour met devan lasanble an 2013.

“Konsernan Nisa, letan ki minis ti dan lasanble, sa lazans ti’n fini anvoy son kont pour nou komans travay lodit lo la,” i ti dir.

Msye Benstrong i dir ki travay lodit lo kont Nisa pou konmanse boner sa semenn me napa en dat spesifik pour rann sa lodit akoz tou i depan lo resours ki lofis Oditer Zeneral i annan.

“I enportan pour note ki L’Union Estate ek Sociétée Seychelloise d'Investissement pa neseserman tonm anba mon manda pour ganny odite me an sa ki konsern Nisa, son lalwa ki etabli li i dir ki son kont i ganny odite par Oditer Zeneral,” i ti dir.

“Priorite i Nisa me si lofis Oditer Zeneral i ganny demande pour odit sa de lezot, si resours i sifizan alors nou pou fer li.”

Minis ti fer resorti dan son diskour bidze ki sa bann lantrepriz piblik i annan ziska milye 2014 pour konplet travay lo zot kont me Msye Benstrong in dir ki si zot pa arive fer li, zot pou bezwen al devan minis responsab pour Finans pour donn leksplikasyon.