En dezennen spesyal pour trwazyenm-az Roche Caiman |06 January 2014

Bann dimoun trwazyenm-az dan diferan distrik i parmi bann group dan lasosyete ki tre sanse pandan letan festivite.

Zot bann zefor ek travay dir pandan plizyer lannen pour ede batir nou sosyete i ganny rekonnet e apresye. Sa i ganny fer atraver bann aktivite spesyal tel ki parti, donasyon e menm bann vizit ki ganny organize par bann diferan lorganizasyon.

Bann trazyenm-az dan distrik Roche Caiman osi pa’n ganny oubliye pandan sa letan festivite.

En dezennen spesyal ti ganny organize yer dan sant kominoter sa distrik par lakonpannyen G.S Pillay ki’n fer biznes dan nou pei pour plizyer deseni.

Letan ki nou lekip ti ariv laba, en pti lanmizik tre dous ti pe zwe e bann trwazyenm-az ki ti la prezan ti pe dyaloge avek kanmarad, manz bann pti manzay ki ti pe ganny servi e byensir bann diferan rafresisman pa ti manke.

Avan dezennen ti ganny servi, ladministrater distrik Wilbert Omath, manm Lasanble Nasyonal pour distrik Roche Caiman Jeovana Charles ensi ki reprezantan lakonpannyen G.S Pillay ti annan detrwa pti mo pour bann trwazyenm-az.

Msye Omath ek Madanm Charles ti remersye sa lakonpannyen pour organiz sa aktivite pour sa group tre spesyal dan lakominote.

Sa dezennen pou vin en aktivite annyel organize par lakonpannyen G.S. Pillay pour bann trwazyenm-az distrik Roche Caiman.

Enn bann reprezantan sa lakonpannyen in dir ki sa i osi pe mark lanniverser tyermenn sa lakonpannyen, Msye G.S Pillay, ki’n selebre son 84enm lanniverser le 2 Zanvye.

Bann portre ki swiv i montre en pe lanbyans pandan sa dezennen yer.