2013 i rikord mwens aksidan pandan letan festivite |07 January 2014

In annan en rediksyon dan lakantite aksidan pandan peryod festivite an 2013 konpare avek lannen presedan.

Bann drayver pe ganny demande pour swiv bann lareg semen byen e pour pran plis prekosyon pour ki sa sif i kontinyen redwir pandan 2014.

Zofisye ansarz kot seksyon trafik dan departman lapolis, Asistan Sirentandan Wilson Denis, ti fer sa bann pwen resorti yer pandan ki i ti pe koz avek medya lo bann ka aksidan pandan lannen 2013.

Asistan Sirentandan Denis in fer resorti ki sa rediksyon in vin akoz bann zofisye seksyon trafik in reisi mont bann loperasyon e osi gras a bann spot checks ki’n ganny fer.

Lo kote sirkilasyon trafik dan lavil, i ti dir ki drayver i devret amelyor zot konportman lo semen akoz bokou zot i servi zot telefonn mobil pandan ki zot pe dray.

Asistan Sirentandan Denis in dir ki atraver bann spot checks, zot in kapab konstate ki in annan en logmantasyon dan lakantite ka kot drayver pe dray avek en laysenns ki’n ekspire e menm anba lenflians lalkol.

Bann drayver pe ganny demande pour pran plis prekosyon lo semen e pour servi bann akseswar telefonn si zot annan pour servi zot telefonn mobil letan zot pe dray.

“Bann drayver i devret fer sir ki zot transpor i annord avan ki zot al lo semen e zot devret pran zot responsabilite pour zot pa dray anba lenflians lalkol ouswa lezot sibstans tel ki drog,” i ti azoute.

“Nou pe esey fer fason ki ka fatal an rezilta bann aksidan i redwir sa lannen vi ki lannen pase ti annan 8 ka.”

I ti azoute ki i osi enportan ki bann drayver i annan tou zot dokiman neseser annord pandan ki zot lo semen.

Konsernan bann ki mont moter, i ti fer resorti ki i enportan pour zot obeir lareg semen pour evit aksidan.

“Nou pe osi demann bann siklis pour fer sir ki zot bisiklet i annord, pour asire ki zot annan zot crash helmet. Bann zanfan osi nou pe demann zot pour pa zwe dan semen,” i ti dir.

Plizyer fwa nou vwar bann pyeton pe ekout lanmizik an servan zot earphone ler zot pe koup semen. Alors i enportan ki zot osi zot pran byen zot responsabilite lo semen, Asistan Sirentandan Denis ti dir.

I ti fer resorti ki sa bann prekosyon ava ede minimiz lakantite aksidan lo semen.

Bann portre ki swiv i montre serten parmi bann aksidan ki ti arive lannen pase.