En nouvo progranm pour ede reviv bann bon valer |09 January 2014

Avek mondyalizasyon ek lezot lenflians etranze e modern, depi en bon pe letan nou sosyete pe santi li perdi son bann valer tradisyonnel tel ki lanmour, lonnekte, respe, pasyans, konpasyon, lapartaz, lape, latolerans, gratitid, responsabilite, eksetera.

Se avek bi reanmenn en kiltir bon valer dan nou sosyete ki Departman Lazenes in inisye en nouvo progranm ki apel ‘Valer Pour Mwan, Valer Pour Nou Tou’.

Sa nouvo progranm ti lanse yer par Vis-Prezidan Danny Faure, ki osi minis responsab pour lazenes, dan en pti seremoni ki ti deroul dan Lasal Konferans STC dan prezans bann minis, sekreter prensipal, travayer lazenes, ansennyan, paran e bann zenn.

Progranm ‘Valer Pour Mwan, Valer Pour Nou Tou’ i vize a bann adolesan e bann zenn ki atraver zot bann aksyon dan lekol, kominote e landrwa travay pou kontribye reanmenn bann bon valer dan nou sosyete.

Dan en pti diskour pour mark sa lokazyon, Vis-Prezidan Faure ti dir ki se dan sa peryod lavi kot karakter en dimoun i ganny formen e kot bann bon latitid e labitid i devlope. I ti dekri sa progranm koman enn avek bokou lenportans pour nou pei, nou sosyete e pour nou tou.

«Kalite nou sosyete demen i baze lo karakter, latitid e valer ki nou adolesan e zenes ozordi zot posede ler zot pe grandi. […] Nou pa kapab viv en lavi sen e sof san pratik sa bann bon valer, bann standar e konviksyon ki gid nou panse ek nou fason fer. Bann valer zot ranforsi ou menm konplemant kanmarad. Linite, respe, larmoni i mars ansanm, tandis ki responsabilite, determinasyon e travay dir i bann pilye ki anmenn prosperite pour nou pei,» Vis-Prezidan Faure ti dir.

Vis Prezidan ti konklir par adres en pti leson moral a bann zenn. I ti dir zot ki dan lavi toulezour bann valer etik, moral e spirityel i en proteksyon kont tou lefe negatif e destriktif – en zarm ki lit kont bann fleo sosyal, en miray solid ki protez nou, en lafors ki fer nou rezet sa ki pa bon, en gid ki montre nou semen ver sikse e en sipor ver en transformasyon pozitif.

«Si nou pa promot e viv bann bon valer, nou parey en bato ki pe drive lo losean, en bato san konpa,» i ti dir bann zenn.

Progranm ‘Valer Pour Mwan, Valer Pour Nou Tou’ pou adopte en valer diferan tou le mwan, e devlop li pandan en peryod 3-an. Valer ki’n swazir pour son premye mwan lenplimantasyon i ‘determinasyon’.
 
Pandan sa lannen, sa progranm pou osi met lanfaz lo bann valer ki lye a bann levennman nasyonal e lo tenm nasyonal deklare par Prezidan James Michel ki ‘Lannen Enternasyonal Bann Pti Leta Zil : Sesel en Nasyon Zil Determinen’.