LANREZISTREMAN VOTER 2014 : |09 January 2014
Lendi le 13 Zanvye 2014 ziska Zedi le 30 Zanvye 2014
Egzers ou drwa demokratik
Fer ou devwar konstitisyonnel
Eski ou annan 18-an e plis ?
Eski ou pou ganny 18-an ant le 1 Zanvye 2014 ek le 31 Mars 2015 ?
Eski ou’n sanz landrwa reste ?
Eski ou’n sanz ou non par egzanp par maryaz/divors oubyen otreman ?
Al verifye rezis voter dan distrik kot ou pe reste pour fer sir ki ou bann detay personnel i aparet dan rezis voter
Mazinen ki en bon rezis voter i depan lo ou
ALOR
Fer li ou drwa ek ou devwar pour garanti en lalis kredib
Ou kalifye pour anrezistre koman en voter si
• Ou en sitwayen Sesel;
• Ou annan 18-an an montan;
• Ou reste dan en sirkonskripsyon elektoral;
• Ou pa’n anrezistre koman en voter dan en lot distrik;
• Ou pa diskalifye pour anrezistre koman en voter dan okenn eleksyon;
• Ou pa pe servi en santans prizon enpoze par en lakour Sesel pour en peryod sis (6) mwan ou plis;
• Ou pa’n ganny deklare ofisyelman par en lakour konmkwa ou fou ouswa ganny detenir koman en kriminel;
• Ou pou ganny 18-an nenport zour pandan en peryod 15 mwan apre le 1 Zanvye 2014;
Bann zenn ki pou ganny 18-an dan sa peryod ant le 1 Zanvye 2014 ek le 31 Mars 2015, zot kalifye pour enspekte rezis voter dan zot distrik.
Lanrezistreman pou fer dan sa bann landrwa swivan:
ANSE AUX PINS KOT LEKOL
ANSE BOILEAU DAN SANT KOMINOTER
ANSE ETOILE DAN SANT KOMINOTER
ANSE ROYALE KOT LEKOL EK KOT KORDGARD
AU CAP KOT LENSTITI KREOL EK KOT LEGLIZ POINTE AU SEL
BEAU VALLON KOT LAKRES
BAIE LAZARE KOT LAKRES
BAIE STE ANNE DAN SANT KOMINOTER
BEL AIR DAN SANT KOMINOTER
BEL OMBRE DAN SANT KOMINOTER
CASCADE DAN SANT KOMINOTER
RIVIERE ANGLAISE KOT LEKOL
GLACIS KOT LADMINISTRASYON DISTRIK EK SANT REABILITASYON, ANSE NORD-EST
GRAND ANSE MAHÉ KOT LEKOL GRAND ANSE EK LEKOL LA MISÈRE
GRAND ANSE PRASLIN DAN SANT KOMINOTER
LA DIGUE KOT BIRO LADMINISTRASYON DISTRIK
LES MAMELLES DAN SANT KOMINOTER
MONT BUXTON KOT LEKOL LA ROSIÈRE
MONT FLEURI KOT FAKILTE LEDIKASYON (ex-NIE)
PLAISANCE KOT BIRO LADMINISTRASYON DISTRIK
PORT GLAUD KOT LEKOL
POINTE LARUE KOT LAKRES
ROCHE CAIMAN DAN SANT KOMINOTER
SAINT LOUIS KOT LEKOL BELONIE - ANSYEN ST. JEAN BOSCO
TAKAMAKA KOT BIRO LADMINISTRASYON DISTRIK
Tou distrik Kot biro Komisyonner Eleksyon
Aarti Chambers Lasanm 203 Mont Fleuri
Pandan lasemenn, vedir Lendi ziska Vandredi, lanrezistreman voter dan distrik i fer depi 3er apremidi ziska 6er diswar.
Pandan wikenn, vedir Sanmdi ek Dimans, lanrezistreman dan distrik i fer depi 10er bomaten ziska 2er apremidi.
Kot Biro Eleksyon, lofis nimero 203, Aarti Chambers, Mont Fleuri vizavi lopital, lanrezistreman i depi 10er bomaten ziska midi e 1er apremidi ziska 6er diswar pandan lasemenn (Lendi a Vandredi) e pandan wikenn (Sanmdi ek Dimans) depi 10er bomaten ziska 2er apremidi.
I neseser e enportan ki si ou kalifye koman en voter ou al enspekte rezis voter dan ou distrik.
I enportan ki ou annan ou kart idantite avek ou ler ou al enspekte rezis voter pour fer sir ki ou detay i koresponn avek rezis voter.
Si en dimoun in sanz son non swa par maryaz ou divors, i enportan ki i anmenn avek li lorizinal sa sertifika maryaz/divors ek en fotokopi sa menm sertifika letan i al anrezistre.