Lapolis i raport en dezyenm ka lanmor dan de zour |09 January 2014

Lapolis in raport en dezyenm ka lanmor dan de zour apre ki Elvis Suzette, aze 28-an ki reste La Batie, Beau Vallon, ti perdi son lavi apre ki i ti sibir en blesir anba son lonbri dan en lensidan kot son lakour.

«Lapolis ti ganny en rapor Mardi swar ver 9er a 9er15 kot Msye Suzette ti raport avek lapolis ki i ti’n ganny en diskisyon avek son madanm kot i ti’n tap son madanm e i ti sorti dan lakaz me ler i ti retournen son madanm pa ti la. E la lapolis ti pran kontak avek sa madanm e zot ti ganny li avek zot premye koud telefonn. Sa madanm ti asir lapolis ki i napa okenn problenm avek son msye e ki i pa ti bezwen lasistans lapolis,» Msye Jean Toussaint, portparol lapolis ti dir yer avek lapres.

I ti azoute ki lapolis ti dir avek Msye Suzette ki si i santi ki i annan okenn diskisyon ki kapab leve i pou meyer pour li rod en landrwa tanporer pour li dormi pour sa swar. Me Msye Suzette ti dir ki i pe retourn se li e ki i pe al dormi.
 
Msye Toussaint ti azoute ki ti enpe letan avan minwi ki lapolis ti ganny rapor sorti kot Lopital Sesel ki en zonm in admit avek en blesir e lapolis ti ganny enformen ver 9er50 yer bomaten ki Msye Suzette ti’n mor Lopital Sesel dan swen entansif.

«Vi ki sa lensidan in ariv kot lakour e bann lendikasyon i montre ki sa aksyon in ganny komet par madanm sa zonm, sa madanm in ganny arete e i an detansyon lapolis antretan ki lanket in ouver e ki plis lenformasyon i ganny ranmase,» Msye Toussaint ti azoute.

Sa madanm, aze 26-an, i annan 3 zanfan. De parmi sa bann zanfan pa pour Msye Suzette. Msye Toussaint i dir ki dapre lenformasyon, sa bann zanfan ti pe dormi ler lensidan ti arive e apre larestasyon sa madanm zot ti al reste avek en vwazen e la sa bann zanfan -- ki aze 11-an, 7-an e 1-an -- pe ganny pran ka avek par departman sosyal.

«Sa ka i vreman trakasan vi ki i enplik en koup e tou resaman nou fek vwar en tel lensidan ki ti enplik en lot koup. Lapolis i konsernen avek bann ka ek sitiasyon ki enplik bann koup e lapolis pe lans en lapel pour demann zot pour rod en solisyon apropriye pour zot kapab rezourd zot konfli,» Msye Toussaint ti dir.

I ti osi profite pour lans en lapel avek manm piblik an rapor avek sa lensidan ki ti arive Mardi kot lekor Gina Emmanuelle ti ganny ranmase dan delo sale deryer kot sant sosyal Rivyer Anglez.

Msye Toussaint in demann nenport dimoun ki kapab  annan okenn lenformasyon oubyen ki’n vwar okenn devlopman an relasyon avek sa lensidan pour zot pran kontak avek lapolis. Zot kapab fer sa lo nimero 133, sa nimero ki gard nimero sa dimoun ki pe telefonnen konmen en nimero enkoni.