En loto i pran dife lo semen La Misère |09 January 2014

Ver 8er30 yer bomaten nou lofis ti ganny enformen ki en loto ti pe pran dife lo semen La Misère.

Letan ki nou lekip ti ariv laba kot sa lensidan, nou ti vwar en loto mark Daihatsu Sirion ki ti’n konpletman brile.

Bann zofisye Lazans Servis Tenny Dife ek Sovtaz ti’n fini tenny sa dife.

Met sa Daihatsu Sirion rouz ki pa ti’n ganny okenn dimal ti dir nou ki i ti remark en pti dife devan son loto.

I ti debarke e answit esey rod led, me zis en pti moman apre son loto ti konmans pran dife.

Sa lazans ti dir ki zot in ganny en rapor ki en loto lo sa larout ti pe pran dife ver 8er11 bomaten.

Bann zofisye lo stasyon tenny dife ek sovtaz Anse Boileau ti ganny deplwaye pour vin tenny sa dife.