Lapolis pe tret lanmor Gina Emmanuel koman en doub mert |10 January 2014

Lapolis pe tret koman en doub mert lanmor Gina Emmanuel, sa fiy ki son lekor ti ganny ranmase dan lanmer Mardi English River.

Sa i akoz dan legzaminasyon letopsi in ganny devwale ki Gina ti ansent avek en pti garson 6 mwan.

Portparol lapolis Jean Toussaint ti dir avek medya yer apremidi ki rapor letopsi ki’n fer lo lekor Gina in montre ki lakoz son lanmor se akoz son likou ti’n kase.

Sa madanm aze 24-an in osi annan lemorazi laservel e levidans in osi montre ki in osi ganny bate.

Msye Toussaint in dir ki ler prezimen ki lanmor in kapab arive se ant 8 a 9er-d-tan avan ki son lekor ti ganny ranmase Mardi ver 9er45 bomaten.

Msye Toussaint in dir ki lapolis pe esey etabli kontak e anmas lenformasyon avek mazorite dimoun ki zot konnen ti pros avek Gina pour kapab met ansanm e fer zot lanket.

Lapolis pe demann manm piblik ki annan okenn lenformasyon ki kapab ed zot dan zot lanket pour telefonn biro CID lo 4288018 ouswa nimero 133 ki personn pa pou konn ou lidantite e nimero telefonn.

Msye Toussaint in osi dir ki lapolis pe dekouraz manm piblik pour fer lanket lo zot menm akoz sa i kapab afekte lanket ki pe ganny fer par lapolis osi byen ki levidans.

Lekor Gina ti ganny ranmase dan lanmer dan zanmerant Ile du Port e sant kominoter English River.