Movetan i fer dega lo Praslin |14 January 2014

Gro lapli ki’n tonbe lo Praslin dan lannwit Dimans ziska boner yer bomaten, avek en maksimonm 152 milimet lapli ki’n rikorde Salazie, in okazyonn serten dega lo sa zil.

La Digue ek bann zil zalantour parey Curieuse in osi rikord gro lapli.   
 
Dapre ladministrater distrik Baie Sainte Anne, Msye Kenneth Pointe, se son distrik ki’n ganny plis afekte avek lateras grennen e delo ki’n monte e koz linondasyon dan serten landrwa plat lo lakot.

Lensidan pli mazer i en lateras ki’n grennen lo semen Vallée de Mai, dan en landrwa ki apel Hauteur Fatima. Semen laba in konpletman bloke depi yer e menm si in annan travay pour tir later rouz ek labou, Lazans Transpor lo Later (SLTA) ti’n deside pour gard sa morso semen fermen ziska ozordi bomaten akoz avek delo ki ti pe koule sorti lo montanny, ti annan risk ki sa lateras i grenn ankor.

Tou trafik ant Baie Sainte Anne ek Grand Anse ti konsekaman pas par Consolation kot semen in kapab reste ouver pour sirkilasyon, menm si laba en lateras ti’n osi grennen dan zanmerant sant kominoter.

Lensidan lateras grennen – erezman san okenn konsekans grav – ti osi raporte kot en lakaz Vilaz Joseph Baie Sainte Anne, obor lotel Raffles Anse Boudin e osi kot lotel La Reserve Anse Petit Court.

Lo kote linondasyon, sa in ariv plito dan rezyon Marie Jeanne Estate ek Côte d’Or. Si Côte d’Or bann drenaz ti’n debloke e delo ti’n preski sek ver lafen lazournen yer, ti ankor annan enpe delo dan Marie Jeanne Estate.  Ladministrater distrik Baie Sainte Anne in dir ki sa in koze par en problenm drenaz.

Dapre Msye Pointe okenn dimoun pa’n ganny blese e brigad dirzans sorti dan sa de distrik Praslin in entervenir vitman pour adres sitiasyon. Lezot partner tel ki SLTA, Minister Lanvironnman ek Lenerzi e lapolis in osi zwenn avek Departman Devlopman Kominoter pour met keksoz anba kontrol.

Dapre Servis Meteorolozi ki baze lo Erport Enternasyonal Pointe Larue, sa kondisyon letan in koze par e zòn lapli dan nou rezyon e ki’n vin pli aktiv an rezilta en siklonn apele ‘Colin’ ki’n bouz pli dan sid sa bann dernyen zour.

Servis Meteorolozi in osi azoute ki sa kondisyon i normal pour mwan Zanvye ki normalman mwan pli mouye dan lannen.

Dapre previzyon letan, nou ekspekte ganny ankor plis lapli Zedi oubyen Vandredi.

Bann portre ki akonpanny lartik i montre serten dega lo Praslin koze par movetan.