En gro ros i blok semen Sans Soucis |17 January 2014

Servis Meteorolozi ti’n prevwar gro lapli pour yer ek ozordi. Lapli ti annefe konmans tonbe yer, akonpannyen par gro divan lo apremidi, avan ki botan ti retournen ver lafen lazournen.

Erezman ki sa kondisyon letan pa’n okazyonn gro dega, sof pour sa gro ros e sa poto elektrik ki ti tonm lo semen Sans Soucis, zis par lao rezidans Lanbasader Lasin.

Aparaman se en pye dibwa ki ti tonm lo bann difil dan en vale par anba semen e okazyonn sa poto elektrik pour kase e blok sa morso semen. E se an rezilta sa poto ki ti’n tonbe ki later ti destabilize dan sa landrwa e fer ki sa gro ros ti deboule.

Lo Praslin, semen Vallée de Mai ti ankor fermen yer an rezilta lateras ki ti’n grennen depi Lendi Hauteur Fatima.

Sel lensidan ki ti raporte lo sa zil yer ti en lot lateras ki’n grennen kot en lakaz Salazie, me san okazyonn okenn domaz.

Lotorite i ankor pe demann piblik, sirtou bann drayver ek pyeton pour pran byen prekosyon lo semen pandan sa peryod lapli pour evit aksidan.