Gro lapli i koz serten dega |03 February 2014

Divizyon Risk ek Dezas ti mobiliz son bann manm ek tou son bann partener yer apre ki Lofis Servis Meteorolozi ti deklar en alert apre ki Mahé, Praslin, La Digue ek bann zil pros ti eksperyans lapli toransyel ki ti koz linondasyon enpe partou.

Alert nimero 1 ti reste anfors dan pei ler zournal Nasyon ti al enprimen.

Dan en kominike ki DRDM ti fer sorti i ti notifye bann manm piblik pour reste se zot si zot ti napa okenn rezon spesifik pour sorti. E bann motoris ti ganny konseye pour pran bokou prekosyon letan ki zot ti pe servi semen. DRDM ti osi dekouraz dimoun pour deplase pandan en tel letan.

Laplipar distrik ti ganny afekte par sa gro lapli ki ti tonb en pe partou lo Mahé.

Distrik Grand Anse Mahé kot i annan 3 pon, delo ti mont lo semen sak fwa ki lapli ti tonm for. E semen Port Launay ki zis par devan pon Constance Ephelia Resort and Spa li osi ti inonde.

Zournal Nasyon ti ganny sans al fer en pti letour pour vwar bann dega. Lazans Transpor lo Later ti ferm semen Mount Simpson apre ki sa semen ti’n ganny andomaze par larivyer Odas ki ti deborde e koul dan semen.

Ler ki zournalis ek fotografer Nasyon ti ariv Mount Simpson, sekreter prensipal pour Devlopman Kominoter ek Spor, Msye Denis Rose, ti deza pe enspekte bann dega avek son tim. Osi prezan ti Msye Galen Bresson, manm Lasanble Nasyonal pour distrik Bel Ombre, ek son tim brigad dirzans.

«Sa in arive dan 7er bomaten e pour ler ki sa in arive bokou dimoun ki abitye deplase dan dimans bomaten pa ti ankor sorti kot zot lakour. Nou pa anvi mazinen kwa ki ti ava kapab arive si ti annan dimoun ki ti pe servi semen pandan sa letan,» Onorab Bresson ti dir.

I ti osi azoute ki bokou lakaz in sibir inondasyon e menm delo in monte apepre en met a en met edmi oter.  Bann rezidan ti osi demontre sa bon korperasyon e zot in ed zot bann vwazen pour fer baraz avek goni disab pour esey anpes delo antre dan zot lakour.

Zournal Nasyon ti osi aprann serten landrwa dan zalantour lotel Savoy ki ankor anba konstriksyon ti inonde. An arivan laba bann zofisye Servis Tenny Dife ek Sovtaz e Korporayon Litilite Piblik ti deza pe donn en koudmen bann travayer pour ponp delo ki ti’n monte.

Serten lateras in osi degrengole e Lazans Transpor lo Later ti deplas son bann zofisye pour kapab eklersi semen.

Vi ki sa letan lapli ti sipoze kontinyen pandan lannwit bann manm piblik ti ganny demande pour fer sir ki zot drenaz i debouse e ki zot pran bann mezir pour protez zot lakour e minimiz domaz pandan sa movetan.

Nou seri portre (tire par nou fografer Joena Bonnelame) i montre en pe dega okazyonnen par sa gro lapli yer.