Ros glise i andomaz en garaz Le Rocher |04 February 2014

Twra gros ros ti glise e andomaz en garaz Le Rocher, zis anler par deryer faktori Sodepak.

Dapre propriyeter sa garaz, Msye Guy Edmond, i ti’n fek fini fer travay renovasyon lo sa garaz.

I ti dir ki sa lensidan ti ariv ver minwi Dimans pour al lo Lendi. I ti ganny en kou-d-telefonn par en vwazen ver minwi e ven minit plitar i ti’n fini arive.

Sa glisman ros ti an rezilta gro lapli ki ti pe tonbe depi sa detrwa zour, kot later ki ti pe tenir sa bann ros  anler lo lateras pa’n kapab tenir pwa delo. Sa bann ros, ki ti’n kouver avek lalyann anvaisan, ti kraz en bon bout sa garaz e fini par al kraz en kontener lanmenm obor ki ti osi apartenir a Msye Edmond.

« Gran mersi zot in zis glise e zot pa’n deboule, sinon zot ti pou al rann lapel dan Sodepak. Ler zot in tap dan sa kontener zot in reste lanmenm dan sa plas,” i ti eksplike.

Lotorite konsernen tel ki ladministrasyon distrik Les Mamelles, reprezantan departman zesyon risk ek dezas (DRDM), Korporasyon Litilite Piblik (PUC) e osi lakonpannyen lasirans Sacos (vi ki sa garaz ti asire) ti lo teren yer pour evalye sitiasyon.

Danze ki sa bann ros ti pou koze pa ti’n ganny prevwar oparavan akoz zot ti’n kouver anba lalyann anvaisan. La ki i annan ankor ros ki kapab glise e menm deboule, en kontrakter in ganny idantifye pour  koupay sa bann lalyann e eklersi landrwa kot lezot travay ava komanse pour kas sa bann gro ros e retir sa bann ki riske deboule.

Nou portre i montre en pe dega ki sa bann gro ros in okazyonnen.