Progranm pour kontrol lera |07 February 2014

Minister Lasante an kolaborasyon avek Minister Lanvironnman ek Lenerzi pe al enplimant en progranm pour kontrol lera.

Sa progranm pou ganny fer dan Victoria ek son zalantour pandan sa prosen sis semenn. Sa pou fer dan rezyon Hermitage ziska St Louis ek Vilaz Quincy.

Pandan sa peryod konprenezon ek sipor manm piblik i enportan. Sa bann pratik swivan i neseser pour garanti sikse sa legzersis :

• Evite gard manze deor ek dan bann landrwa ki ouver ;

• Lave e retir bann resipyan ki lisyen i manz ladan ;

• Kouver tou bann resipyan ki annan delo ladan ;

• Bann prodikter manze pe ganny demande pour asire ki zalantour zot landrwa i prop e napa restan manze ;

• Evite met salte dan bin piblik apre 6er diswar. Dan ka ki zot bezwen depoz zot salte apre sa ler, pa met salte ater, me plito met li dan bin e gard bin byen kouver ;

Manm piblik pe osi ganny demande pour fer zot kontribisyon dan sa progranm par pran bann mezir  pour redwir popilasyon lera kot zot lakour.