Manm piblik i ganny sansibilize lo maladi kanser |10 February 2014

Manm piblik ti ganny sans konn en pti pe plis lo bann diferan kanser ki annan e lo bann bon pratik pour redwir nou risk ganny sa maladi.

Sa ti atraver en kanpanny ki ti fer dan lavil Victoria Sanmdi lazournen par bann manm lasosiasyon Cancer Concern.

Zot ti pe distribye bann lenformasyon avek manm piblik e serten ti menm baze kot Katedral St Paul kot manm piblik ti kapab pase e demann plis lenformasyon ou klarifikasyon avek sa bann manm lasosiasyon lo sa maladi.

Ti osi annan diferan keksoz anvant tel ki sapo ek triko avek bann mesaz relye avek kanser lo la.

Sa aktivite i form parti en seri ki ti pe ganny organize semenn pase pour komemor lazournen enternasyonal pour kanser ki le 4 Fevriye.

Sesel in premye fwa selebre sa lazournen an Fevriye dan plas fer li an Oktob ki ganny dedye pour kanser tete.

Sete pandan miting annyel an Novanm lannen pase ki bann manm sa lasosiasyon ti aprouv en mosyon pour komemor sa lazournen an Fevriye aparti lannen 2014.

Bann aktivite ti pe deroul anba tenm ‘Laverite lo kanser’.