Lotorite distrik Mont Buxton i reafirm langazman anver bann zabitan |14 February 2014

Servi dimoun Mont Buxton byen e fer sir ki zabitan sa distrik i responsab pour zot prop lavi i mesaz kle ki’n ganny fer resorti dan en miting avek bann travayer ladministrasyon sa distrik osi byen ki bann partener resaman.

Sete Minis pour Zafer Sosyal, Devlopman Kominoter ek Spor Msye Vincent Meriton, ki manm komite santral Parti Lepep pour sa distrik, ki ti fer sa pwen resorti pandan sa miting.

Osi prezan ti manm Lasanble Nasyonal pour distrik Mont Buxton Manmzel Sheryl Vengadasamy e ladministrater distrik Manmzel Michelle Sabury.

Pandan ki i ti pe adres bann ki ti prezan kot sa rankont, Minis Meriton ti dir ki travay koman en lekip i tre enportan pour ede fer distrik avanse.

Sa rankont ti loportinite pour diskit lo bann defi ki distrik in fer fas avek pandan lannen 2013 e pour idantifye bann landrwa kot devret annan plis amelyorasyon.

Minis Meriton ti dir ki i enportan pour ranforsi lo prevansyon e rod bann nouvo stratezi pour adres bann fleo sosyal ki pe afekte sa distrik.

Lo son kote, Manmzel Vengadasamy ti dir ki kominikasyon i reste en pwen kle pour fer distrik marse.

I ti osi koz lo bann lezot pwen tel ki konfidansyalite e bon kordinasyon.

Manmzel Vengadasamy ti osi met lanfaz lo travay lekip ki i ti dir i tre enportan pour sa ganny ranforsi pandan sa lannen pour ed distrik bouz devan.

I ti azoute ki bokou plis travay i devret ganny fer lo kote lazenes e pour vin pli aktiv pa zis an term aktivite ki ganny organize me osi pour konn plis bezwen bann zenn dan distrik.

Manmzel Sabury ti felisit bann travayer biro ladministrasyon pour zot bon korperasyon ek devouman pandan lannen 2013 e i ti demann zot pour kontinyen lo sa bon semen.

I ti azoute ki distrik Mont Buxton in fer bokou progre pour redwir lakantite dimoun ki lo welfare e sa i devret kontinyen.

Pandan sa rankont, bann nouvo linisyativ pour ede amelyor lavi dan distrik e osi pour elimin bann defi sosyal ti ganny diskite.