Lasanble Lazenes i aprouv de mosyon dan son dernyen sesyon |20 February 2014

Bann manm Lasanble Lazenes in aprouv de mosyon parmi trwa ki ti ganny prezante pandan zot dernyen sesyon Sanmdi bomaten.

Mosyon ki pa ti ganny aprouve dan sa sesyon, ki ti fer kot National House, ti ganny prezante par Trevor Louise.

I ti pe demande ki sa lasanble pe propoze ki Minister Ledikasyon i konsider lezot opsyon avan ki en etidyan i ganny sispansyon endefini ler zot kas lalwa lekol.

Onorab Louise ti azoute ki Lasanble Lazenes i rekonnet ki sa sispansyon i depan lo gravite ek repetisyon lofans, « me nou santi ki entel pinisyon i ankor enpe tro sever ».

Sa mosyon ti ganny segonde par zenn onorab Anil Bacco.

Enn bann mosyon ki’n ganny aprouve ti ganny prezante par Neri Julius e sa ti ganny segonde par Carol Radegonde.

Son mosyon ti pe dir ki Lasanble Lazenes pe propoze ki en sistenm database modern i ganny entrodwir dan tou bann Youth Services Bureau.

Sa a fer ki i ava annan en pli bon rikord lenformasyon lo sak zenn ki vizit sa bann sant.

Onorab Julius ti dir ki Lasanble Lazenes i konstate ki si en zenn i sanz landrwa reste, par egzanp sorti Mahé pour al reste lo Praslin, son lenformasyon a vitman ganny detekte pour swivi.

Dezyenm mosyon prezante par Ziggy Adam, ti pe dir ki Lasanble Lazenes pe propoze ki Konsey Nasyonal Lazenes i met enpe plis zefor ek lavites dan preparasyon Kod Kondwit pour Lasanble Lazenes.

« Nou konstate ki en tel dokiman a donn plis respe ek lenportans sa progranm e ki tou bann manm a vin pli serye e responsab pandan ki zot pe swiv zot manda enn an, » i ti dir.
Sa mosyon ti ganny segonde par Catherine Didon.