Lazournen Enternasyonal Lalang Maternel |21 February 2014

Minis i salye zefor pour valoriz lalang maternel

Minis seselwa responsab pour kiltir, Msye Alain St Ange, in salye zefor tou bann pep ki pe travay pour fer zot lalang maternel ganny rekonnet.

Minis St Ange in dir sa dan son mesaz alokazyon Lazournen Enternasyonal Lalang Maternel ozordi.

Teks entegral mesaz Minis St Ange i lir koumsa :

« Le 21 Fevriye, lokazyon kot nou selebre Lazournen Enternasyonal Lalang Maternel sak lannen, in fini vin en tradisyon isi Sesel.

« Akoz ?

« Rezon pour sa se ki isi nou napa okenn lager lalang, ni lager etni, e nou koni partou dan lemonn koman sa vre pep larkansyel ki annan en pti pe de tou bann kontinan lemonn, me ki anmenmtan in vin en sel pep ini. Nou rekonnet en sel lidantite, e nou viv koman en sel pep.  Nou reklanm tou eleman nou miltikiltiralite koman pour nou, sakenn de nou.

« Lannen pase sirtou, nou partikilyerman fyer ki nou’n kapab selebre tou bann konponan nou Kreolite – depi ‘Commonwealth’, ‘La Francophonie’, ‘Fet’Afrik’ … e pour premye fwa nou ti selebre en lazournen Seselo-Endyen. Sa lannen, 2014, finalman nou’n konplet sa serk ki fer nou lidantite, parske nou’n reisi fer en premye lazournen Seselo-Sinwan. Se sa pour nou ki vedir lidantite Kreol – en lidantite kot tou nou leritaz miltikiltirel i ganny valorize egalman e revandike par tou nou pep.

« Sa lannen osi nou fyer ki Sesel in ankor en fwa zwe en rol far dan domenn lalang ek kiltir Kreol atraver lansman Lenstiti Kreol Enternasyonal. Nou swete ki sa i ava aport bokou fri pour tou sa ki enterese dan devlopman Kreol.

« Se ensi ki mon ti a kontan swet tou dimoun ki konsider Kreol koman zot lalang maternel, bonnfet, e bonnfet osi tou bann pep ki pe travay pour fer zot lalang maternel ganny rekonnet. »