Follow us on:

Facebook Twitter LinkedIn YouTube

Archive -Seychelles

Sesel i selebre Lazournen Lalang Maternel |22 February 2014

En versyon Kreol Konstitisyon Larepibilik Sesel, osi byen ki premye liv elektronik an Kreol Seselwa in lanse ofisyelman.

Sa ti deroul dan en seremoni yer apremidi kot Lenstiti Kreol, Au Cap, pour mark Lazournen Enternasyonal Lalang Maternel.

Sa seremoni ti deroul dan prezans Minis pour Tourizm ek Kiltir Alain St Ange, Minis pour Ledikasyon Macsuzy Mondon, Minis pour Zafer Etranzer Jean-Paul Adam, Prokirer Zeneral Rony Govinden,
sekreter prensipal pour kiltir Benjamine Rose, manm Lasanble Nasyonal pour distrik Au Cap Murielle Marie, bann envite distenge, staf Lenstiti Kreol, en group zanfan ek ansennyan lekol Au Cap.

« Isi Sesel, nou’n toultan gard en pozisyon avangard dan lafason ki nou donn bataz nou lalang maternel pour li devlope. Sa i evidan depi bann premye lannen ki nou’n pran desizyon pour rekonnet Kreol, en lalang avek en listwar soubalternizasyon, konman nou lalang maternel, » direkter Lenstiti Kreol, Penda Choppy, ti dir pandan ki i ti pe adres bann envite.

Pandan seremoni Dokter Marie-Reine Hoareau, sekreter zeneral pour komisyon Unesco Sesel, ti lir mesaz direkter-zeneral Unesco, Irina Bokova, pour Lazournen Enternasyonal Lalang Maternel.

« Sa lannen, en lanfaz spesyal in mete lo bann lalang lokal pour sitwayennte mondyal fokalizasyon lo lasyans, pour montre ki mannyer lalang i asir akse avek konnesans, son transmisyon ek pliralite, » Dokter Hoareau ti lir.

Pandan bann dernyen mwan 2013 e sa de premye mwan 2014, staf Lenstiti Kreol in pas dan en gran prosesis evalyasyon e planifikasyon e an rezilta, Madanm Choppy ti prezant Minis St Ange avek Plan Stratezik ek Plandaksyon Lenstiti kreol.

Madanm Choppy ti osi profite pour prezant Prokirer Zeneral Govinden avek en kopi versyon Kreol Konstitisyon Larepibilik Sesel. Ti osi annan lansman premye liv elektronik an kreol Seselwa ki’n ganny ekrir e prodwir par Robert Mondon.

Madanm Choppy ti profite pour remersye tou bann dimoun ki’n zwe en rol kle pour anmenn Lenstiti Kreol kot i ete ozordi.

« Minis Mondon, pour rol primordyal ki ou’n zwe dan sanzman stati Lenstiti Kreol ; Minis St Ange, pour tou sa bann gran proze vizyonner ki pe vreman fer nou galoupe ; e Minis Adam pour ou sipor kontinyel ; ensi ki tou manm komite Lalang Kreol pour zot travay dir e zot vizilans lo lizaz nou lalang. Mon oule osi dir en tre gran mersi staf Younit Lalang ek Younit Tradiksyon ki’n travay tre tre dir depi Novanm ziska la pour fer tou sa ki pe arive ozordi vin en realite, » Madanm Choppy ti dir.

Pandan seremoni bann envite ti kapab regard enn parmi bann zistwar baze lo lavantir Goula e osi ekout en sanson ki ti ganny sante par en group zanfan lekol primer Au Cap.

» Back to Archive