Rezidan i ganny met azour lo devlopman dan zot distrik |24 February 2014

En seri miting in demare dan bann distrik atraver pei pour met bann rezidan azour lo devlopman e kwa ki pe arive dan zot kominote.

Sa bann rankont i osi lokazyon pour bann rezidan met devan nenport konsern ek pwennvi ki zot annan.

Zournal Seychelles Nation ti ganny sans asiste miting ki ti fer pour distrik Plaisance Sanmdi.

Miting, ki ti deroul dan sant kominoter sa distrik, ti dirize par administrater distrik Claudette Louise e ti ganny asiste par manm Lasanble Nasyonal pour distrik Plaisance Roma Aglae, sef egzekitif Konsey Nasyonal pour Lazenes Vicky Van der Westhuizen e bann rezidan Plaisance.
Pandan miting Manmzel Louise ti prezant en rapor lo bann travay ki’n ganny fer dan distrik pandan lannen 2013 e fer en revi lo bann pwen ki ti resorti dan zot dernyen miting konsiltativ ki ti fer dan distrik.
Manmzel Louise ti osi propoz son plan travay pour 2014 avek tou sa ki ti prezan.

Pour ranforsi enn son pwen dan son plandaksyon, en reprezantan sorti kot Airtel ti eksplik progre dan travay ki Airtel pe fer pour rezourd problenm laliny telefonn ki bann dimoun ki reste Copolia pe rankontre. Bokou rezidan Copolia ki ti prezan ti demontre zot lakontantman anver zefor ki distrik ek Airtel pe fer pour rezourd sa problenm.
Par kont, ti osi annan konsern lo kote bann ki servi kart Cable & Wireless.

“Ler nou ti evalye problem ki zot ti pe rankontre anler Copolia, nou dan distrik nou ti anvoy sa konsern kot tou le de lakonpannyen telefonik. Pour le moman nou’n ganny repons sorti zis kot Airtel, se pour sa rezon ki nou vwar zis reprezantan Airtel isi. Nou pa pou kapab donn zot en larepons konsernan Cable & Wireless," Manmzel Louise ti dir.
Pandan sa miting Madanm Van der Westhuizen ti profite pour donn plis detay lo sa kanpanny ‘Valer pour mwan, valer pour ou’.

Apre sa, bann rezidan ti profite pour met devan zot bann konsern ki zot annan, e sa ti konsern sirtou semen ek sistenm drenaz dan distrik.